Зянковіч вызвалены па просьбе адміністрацыі Трампа — прэс-сакратар Лукашэнкі

1 траўня, Позірк. “Па просьбе адміністрацыі прэзідэнта ЗША [Дональда Трампа] грамадзянін Злучаных Штатаў Амерыкі Зянковіч Юрый Леанідавіч быў вызвалены. Такое рашэнне прынята”, — заявіла 1 траўня прэс-сакратар Аляксандра Лукашэнкі Наталля Эйсмант расійскаму дзяржагенцтву “РИА “Новости”.

Раней амерыканская журналістка Грэта Ван Сустэрэн (жонка намесніка спецпасланніка ЗША па Украіне Джона Коўла) апублікавала ў Х першае фота Зянковіча на волі, зробленае ў амбасадзе ЗША ў Вільнюсе.

Паводле яе, Коўл наведваў Мінск для яго вызвалення Зянковіча.

Аб вызваленні прыгаворанага ў 2022 годзе да 11 гадоў пазбаўлення волі па палітычна матываванай “справе змоўшчыкаў” беларуска-амерыканскага адваката стала вядома вечарам 30 красавіка.

У мінулым годзе Зянковіч звярнуўся да Аляксандра Лукашэнкі з вуснай просьбай аб памілаванні і магчымасці вярнуцца ў ЗША. Заяву ён зрабіў у прадэманстраваным 19 верасня на тэлеканале “Беларусь 1” прапагандысцкім фільме. Пазней яшчэ раз выкарыстоўваўся прапагандай для ачарнення “Радыё Свабода“.

У снежні 2022 года ў судзе Мядзельскага раёна (Мінская вобласць) адбыўся новы працэс у дачыненні да палітвязня. Мужчыну прызналі вінаватымі па арт. 369 КК (абраза прадстаўніка ўлады), тэрмін яго пакарання павялічыўся на паўгода.

У жніўні 2024 года была разгледжана новая справа паводле арт. 411 КК (злоснае непадпарадкаванне адміністрацыі папраўчай установы), палітвязню дадалі яшчэ два гады пазбаўлення волі.