2 траўня, Позірк. Пра чарговую хвалю масавых затрыманняў па матывах паведамляе праваабарончы цэнтр “Вясна”.
“Вялікія лічбы” затрыманых фіксуюцца ў рамках спраў паводле арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). Гэты артыкул улады выкарыстоўваюць для пераследу ўдзельнікаў мірных маніфестацый 2020 года.
“Гэта звязваюць з тым, што ў жніўні гэтага года сыходзіць [пяцігадовы] тэрмін даўнасці прыцягнення да крымінальнай адказнасці за ўдзел у пратэстах”, — гаворыцца ў паведамленні.
Адзначаецца, што ў Цэнтры ізаляцыі правапарушальнікаў у Мінску (1-ы завулак Акрэсціна) затрыманых “па-ранейшаму ўтрымліваюць у нечалавечых умовах у перапоўненых камерах”.
Таксама паведамляецца пра затрыманні па “справе Гаюна”. Такіх выпадкаў “вельмі шмат”, большасць затрыманых — мужчыны, крымінальныя справы ўзбуджаюцца паводле арт. 3614 КК (садзейнічанне экстрэмісцкай дзейнасці).
5 лютага паведамлялася, што ў выніку “несанкцыянаванага ўваходу” невядомыя атрымалі доступ да чату-бота праекта “Беларускі Гаюн”, дзе “збіралася інфармацыя ад людзей”.
Раней праўладныя рэсурсы распаўсюдзілі інфармацыю аб доступе сілавікоў да чат-бота, выставіўшы скрыншоты перапіскі заснавальніка праекта Антона Матолькі з нейкім чалавекам, які, верагодна, меў доступ да бота. У публікацыі змяшчаліся пагрозы тым, хто дасылаў паведамленні. Блогер сцвярджаў, што гэты чалавек “не меў ніякіх доступаў са студзеня 2023 года”.
Праект “Беларускі Гаюн” быў заснаваны пасля расійскага ўварвання ва Украіну ў 2022 годзе, займаўся маніторынгам ваеннай актыўнасці ў Беларусі.
Спыніў працу 7 лютага.
