Банкі за месяц павялічылі прыбытак амаль у 1,5 раза

2 траўня, Позірк. Прыбытак банкаў, якія працуюць у Беларусі, на 1 красавіка 2025 года склаў 859,5 млн рублёў — на 43,9% больш, чым месяцам раней (597,4 млн), і на 1,8% менш, чым на аналагічную дату 2024-га (875,5 млн), сведчыць праведзены “Позіркам“ аналіз даных Нацыянальнага банка.

Нарматыўны капітал на ўказаную дату склаў 22 млрд 285 млн (-4,2% за месяц і +9,6% у гадавым вымярэнні), актывы, схільныя да крэдытнай рызыкі, — 114,7 млрд 852,4 млн (+0,7% і +14% адпаведна).

Неабслугоўваныя актывы — 3 млрд 562,7 млн (+19,8% і -25,9%).

Велічыня пакрыцця ліквіднасці павялічылася да 49,9% (+0,9 п.п. і +8,1 п.п.), чыстага стабільнага фандавання — знізілася да 30,6% (-0,7 п.п. і -1,3 п.п.).

На 1 красавіка 2025 года ў Беларусі быў зарэгістраваны 21 банк (тры з іх — са 100-працэнтным замежным удзелам). Іх статутны капітал — 10 млрд 19 млн рублёў (за месяц і не змяніўся, за год стаў больш на 9,3%).

Запазычанасць па рублёвых і валютных крэдытах, выдадзеных банкамі юрыдычным асобам, на 1 красавіка 2025 года склала 60 млрд 223,7 млн рублёў.

Праведзены “Позіркам“ аналіз паказаў, што актуальная сума запазычанасці на 13,6% большая, чым было на 1 красавіка 2024-га (53 млрд 11,9 млн рублёў), і на 2,2%, чым на 1 студзеня 2025-га (58 млрд 952,8 млн). Пратэрмінаваная запазычанасць на гэтую дату склала 985,9 млн рублёў (рост у 5,7 раза ў гадавым вымярэнні). На 1 студзеня яна складала 733,5 млн рублёў (+34,4%).

Дэпазіты сектараў эканомікі, размешчаныя ў банках, якія працуюць у Беларусі, знізіліся з пачатку года на 1% — з 75 млрд 860,2 млн рублёў на 1 студзеня да 75 млрд 95,9 млн на 1 красавіка, вынікае з праведзенага “Позіркам” аналізу звестак Нацыянальнага статыстычнага камітэта.

Аб’ём рублёвых укладаў зменшыўся на 0,4% (з 41 млрд 368,9 млн да 41 млрд 188,3 млн рублёў), валютных — на 1,7% (з 34 млрд 491,2 млн да 33 млрд 907,6 млн рублёў у эквіваленце).