Качанава назвала “нахабнай” заяву Трампа аб вырашальным укладзе ЗША ў перамогу ў Другой сусветнай вайне
2 траўня, Позірк. “Абсалютна правільна” Аляксандр Лукашэнка называе прапагандыстаў “салдатамі інфармацыйнага фронту, таму што гэта менавіта так”, заявіла старшыня Савета Рэспублікі Нацыянальнага сходу (СР НС) Наталля Качанава, прымаючы кіраўнікоў і супрацоўнікаў дзяржСМІ з нагоды Дня друку (адзначаецца 5 траўня).
“Усяму свету вы кажаце праўду пра Беларусь, пра тое, як жыве Беларусь, пра тое, які беларускі народ, і пра тое, што адбываецца ў нашай краіне, — цытуе Качанаву прэс-служба СР НС. — Таму што фальсіфікацыя, хлусня апанавалі сёння сусветную інфармацыйную прастору. Людзям цяжка зарыентавацца ў гэтым патоку інфармацыі, які льецца кожны дзень”.
Чыноўніца заявіла, што нейкія сілы “сёння спрабуюць перапісаць гісторыю”. “Мы бачым, як гэта нахабна адбываецца. Узяць нават заяву [прэзідэнта ЗША Дональда] Трампа, які нядаўна заявіў, што амерыканцы выйгралі вайну, і абвясціў 8 мая Днём Перамогі. Вось чаму ваша праца, ваша стаўленне да справы так важныя”, — сказала Качанава.
2 траўня Трамп заявіў у сацсетцы Truth Social аб вырашальным унёску ЗША ў перамогі ў Першай і Другой сусветных войнах.
“Многія з нашых саюзнікаў і сяброў святкуюць 8 мая як Дзень Перамогі, але мы зрабілі больш, чым любая іншая краіна, у дасягненні пераможнага выніку ў Другой сусветнай вайне. Я пераймяноўваю 8 траўня ў Дзень Перамогі ў Другой сусветнай вайне, а 11 лістапада — у Дзень Перамогі ў Першай сусветнай вайне“, — напісаў амерыканскі прэзідэнт.
Паводле яго слоў, “прыйшоў час святкаваць” гэтыя перамогі. “Мы перамаглі ў абедзвюх войнах, ніхто нават не наблізіўся да нас па сіле, адвазе І вайсковаму майстэрству, але мы больш нічога не святкуем, таму што ў нас больш няма лідараў, якія ўмеюць гэта рабіць!” — адзначыў Трамп.
Лукашэнка яго словы пакуль не каментаваў.
