Сем банкаў аб’явіла аб новаўвядзеннях у працы з кліентамі

5 траўня, Позірк. Сем працуючых у Беларусі банкаў паведаміла аб змяненні асобных правілаў абслугоўвання і прадставілі новыя магчымасці для кліентаў, сведчыць праведзены “Позірк” маніторынг іх актуальных прэс-рэлізаў.

“Альфа Банк у Беларусі” з 8 траўня па банкаўскіх прадуктах “Чырвоная карта”, “Чырвоная карта плюс”, “Чырвоная карта 2.0” павялічвае мінімальную суму безнаяўнай расходнай аперацыі для афармлення растэрміноўкі з 20 да 50 рублёў.

Банк “Рашэнне” прадставіў карпаратыўным кліентам магчымасць разлікаў у кітайскіх юанях на карысць атрымальнікаў, якія абслугоўваюцца ў банках КНР. Абавязковым да запаўнення ў плацежным даручэнні з’яўляецца код ТНВЭД, які не трапляе ў спісы санкцыйных тавараў, а таксама дэталёвае найменне тавара паслугі.

“Белгазпрамбанк” увёў узнагароду за абмен зношаных, пашкоджаных банкнот у замежнай валюце на плацежныя банкноты ў замежнай валюце ў памеры 9 працэнтаў ад сумы (мінімум 3 рублі).

“Белінвестбанк” аб’явіў аб акцыі для жанчын-прадпрымальнікаў “Дазволь сабе!”, у рамках якой можна атрымаць крэдыт да 300 тыс. рублёў пад стаўку ад 11,5% гадавых. Акцыя працягнецца да 11 жніўня.

“БНБ-Банк” прадаставіў фізічным асобам магчымасць выпуску дадатковых картак розных плацежных сістэм у рамках прадуктаў “Аранжавая” і “Карта 1-2-3”.

“БСБ Банк” спыняе з 12 траўня выпуск новых карт Mastercard “Моцная картка”. Да пазначанай даты можна перавыпусціць бягучую або аформіць новую карту. Праграма лаяльнасці будзе дзейнічаць да канца тэрміна дзеяння карты.

“Тэхнабанк” увёў камісію за прыём і апрацоўку плацежных даручэнняў на папяровым носьбіце як у нацыянальнай, так і замежнай валютах у памеры 12 рублёў за кожны дакумент.

На 1 красавіка 2025 года ў Беларусі быў зарэгістраваны 21 банк (тры з іх — са 100-працэнтным замежным удзелам). Іх статутны капітал — 10 млрд 19 млн рублёў (за год стаў больш на 9,3%), прыбытак — 859,5 млн рублёў (-1,8%).