7 траўня, Позірк. Гродзенская рэгіянальная мытня распачала справу ў дачыненні да 42-гадовага грамадзяніна Беларусі паводле ч. 1 арт. 3331 Крымінальнага кодэкса (незаконнае перамяшчэнне праз мытную мяжу <…> моцнадзейных, атрутных рэчываў, радыеактыўных матэрыялаў, агнястрэльнай зброі, боепрыпасаў, выбуховых рэчываў <…>), паведамляе пракуратура вобласці.
Мужчына заключаны пад варту.
Паводле матэрыялаў справы, падазраваны ў сакавіку 2025 года заехаў на грузавым аўтамабілі з Літвы ў Беларусь. У пункце мытнага афармлення Беняконі (з літоўскага боку — Шальчынінкай) “у пустацелай прасторы пад дэкаратыўнай ашалёўкай салона ў верхнім спальным месцы цягача” былі выяўленыя “чатыры ёмістасці з палімернага матэрыялу з сыпкім рэчывам масай 4.015 гр”. Паводле заключэння эксперта, рэчыва з’яўляецца “бяздымнымі порахамі прамысловага вырабу і адносіцца да катэгорыі кідальных выбуховых рэчываў”.
Пракуратура адзначае, што бяздымныя порахі выкарыстоўваюцца ў якасці кідальных зарадаў для рыштунку боепрыпасаў гладкаствольнай і наразной агнястрэльнай зброі.
Гл. таксама:
Літоўскія мытнікі канфіскавалі на мяжы з Беларуссю царкоўны звон масай 260 кг
На беларуска-літоўскай мяжы затрымалі грамадзяніна Латвіі з забароненымі рэчывамі
