“Белавія” папярэдзіла пра затрымку некаторых рэйсаў з-за “частковага абмежавання” ў “небе цэнтральнай Расіі“

7 мая, Позірк. Аб магчымай затрымцы некаторых рэйсаў папярэдзіла Нацыянальная авіякампанія “Белавія”.

Парушэнне раскладу палётаў перавозчык звязвае з “частковым абмежаваннем“ у “паветранай прасторы цэнтральнай Расіі”.

“У найбліжэйшыя даты магчымыя кропкавыя змены ў раскладзе палётаў з прычыны падрыхтоўкі да параду ў Маскве ў гонар 80-годдзя Перамогі“, — паведаміла “Белавія“.

Часовыя абмежаванні на палёты ў паветранай прасторы Расіі апошнім часам уводзяцца рэгулярна праз палёты ўкраінскіх дронаў.

Толькі 7 траўня, згодна з інфармацыяй Нацыянальнага аэрапорта Мінск, затрыманыя вылеты “Белавія” ў Баку, Батумі, Доху, Казань, Калінінград, Маскву, Наябрск, Санкт-Пецярбург, Стамбул, Шарм-Эль-Шэйх.

Таксама было затрымана прыбыццё рэйсаў з Баку, Батумі, Казані, Калінінграда, Масквы, Санкт-Пецярбурга, Стамбула, Ташкента, Тбілісі, Хургады, Шарм-Эль-Шэйха.

9 траўня у Маскве запланаваны парад у гонар 80-годдзя перамогі ў Вялікай Айчыннай вайне. На ім плануе прысутнічаць Аляксандр Лукашэнка, які звычайна дабіраецца да расійскай сталіцы на самалёце.