Рассельгаснагляд забараніў увоз з Беларусі кармоў для хатніх жывёл

12 траўня, Позірк. Аб забароне ўвозу з Беларусі ў РФ 1,6 тоны кармоў для хатніх жывёл італьянскай вытворчасці паведаміла прэс-служба Паўночна-Заходняга міжрэгіянальнага ўпраўлення Федэральнай службы па ветэрынарным і фітасанітарным наглядзе (Рассельгаснагляд).

Як адзначаецца, у Пскоўскай вобласці ў ходзе кантрольна-наглядных мерапрыемстваў “службовай асобай ведамства ўстаноўлена адсутнасць ветэрынарных суправаджальных дакументаў на перамяшчаны тавар, якія пацвярджаюць яго бяспеку і паходжанне”.

Акрамя гэтага, было парушана ўказанне Рассельгаснагляду — з 23 сакавіка 2023 года “сертыфікацыя кармоў для непрадуктыўных жывёл гэтай фірмы” для паставак у РФ прыпыненая.

“Перамяшчэнне кармоў для непрадуктыўных жывёл па мытнай тэрыторыі Еўразійскага эканамічнага саюза забаронена, аформлены акт аб вяртанні грузу ў Рэспубліку Беларусь”, — гаворыцца ў паведамленні.

Аб аналагічных выпадках Рассельгаснагляд паведамляў 6 траўня — былі затрыманыя і вернутыя ў Беларусь тры партыі кармоў для непрадуктыўных жывёл агульнай вагой 11,5 т.

Раней паведамлялася, што Рассельгаснагляд звярнуўся ў Дэпартамент ветэрынарнага і харчовага нагляду Міністэрства сельскай гаспадаркі і харчавання РФ з просьбай устанавіць “узмоцнены лабараторны кантроль” у дачыненні да шэрагу беларускіх прадпрыемстваў з-за выяўлення ў іх прадукцыі шэрагу парушэнняў.

21 красавіка ў Пскоўскай вобласці РФ спынілі фуру, якая рухалася з Беларусі, у ёй знаходзілася больш за 20 тон аўстралійскай серыялелы (разам з некаторымі іншымі відамі рыбы вядомая пад зборнай назвай “алейная рыба”), вырабленай прадпрыемствам з Новай Зеландыі (тавар, як сцвярджалася, знішчылі).

20 сакавіка паведамлялася, што віцебскія мытнікі спынілі спробу вывазу ў РФ 13 т астуджанага ласося коштам амаль 900 тыс. рублёў. Па дакументах у грузавіку павінны былі быць ванільныя сушкі.

6 сакавіка Дзяржаўны мытны камітэт паведамляў пра спробу вывазу з Беларусі ў РФ буйной партыі астуджанага ласося. Парушэнне патрабаванняў транспарціроўкі рыбнай прадукцыі было зафіксавана гомельскімі мытнікамі “пры правядзенні спецыяльных мерапрыемстваў каля беларуска-расійскага ўчастка мяжы”.