Зазулінская пасля смерці экс-палітзняволенай Кандраценка: Вызваленне вязняў не можа чакаць

13 траўня, Позірк. Вызваленне палітычных вязняў не можа чакаць, як не можа чакаць і іх рэабілітацыя пасля вызвалення, такім чынам прадстаўніца Аб’яднанага пераходнага кабінета (АПК) па сацыяльнай палітыцы Вольга Зазулінская пракаментавала навіну пра смерць экс-палітзняволенай Ганны Кандраценка.

Паводле яе слоў, якія прыводзіць прэс-служба АПК, “час у няволі — гэта час без лячэння і догляду, а часам — без шанцу”.

Зазулінская адзначыла, што смерць маладой жанчыны адбылася не толькі праз хваробу, але і праз “несправядлівасць, малую падтрымку, выпрабаванні, якія не скончыліся нават пасля адбыцця тэрміну”.

Прадстаўніца АПК папрасіла беларусаў звязацца з кабінетам, калі яны ведаюць пра “былых палітвязняў, якім патрэбная дапамога”. “Мы будзем старацца падтрымаць іх усімі магчымымі спосабамі”, — запэўніла яна.

Дэмакратычны лідар Святлана Ціханоўская, каментуючы напярэдадні на сваёй старонцы ў сацыяльнай сетцы Х навіну пра смерць Кандраценка, адзначыла, што “гэтай жорсткасці і несправядлівасці неабходна пакласці канец”.

Былая палітзняволеная Ганна Кандраценка, якая выйшла на волю 20 чэрвеня 2024 года, памерла з прычыны анкалагічнага захворвання сёлета 5 лютага. Жанчыне было 39 гадоў.

Кандраценка была затрыманая 5 траўня 2022 года. 12 ліпеня таго ж года суд Ленінскага раёна Магілёва прызнаў яе вінаватай паводле трох артыкулаў Крымінальнага кодэкса: 368 (абраза прэзідэнта), 369 (абраза прадстаўніка ўлады), 391 (абраза суддзі ці народнага засядацеля). Палітзняволеная была прыгавораная да 3 гадоў пазбаўлення волі са штрафам у памеры 100 базавых велічынь (на той момант 3.200 рублёў).

11 ліпеня 2023 года суд Кастрычніцкага раёна Магілёва прыгаварыў яе яшчэ да 1 года зняволення паводле арт. 369 КК, сума штрафу склала 50 б.в. (на той момант 1850 рублёў). Шляхам паглынання пакаранняў канчатковы тэрмін зняволення застаўся ранейшым — 3 гады.

Прычынай пераследу, верагодна, сталі каментарыі ў інтэрнэце.

Дыягназ Кандраценка быў пастаўлены падчас адбыцця пакарання.

У 2022–2024 гадах у беларускіх месцах несвабоды памерла не менш за сем чалавек, якіх беларускія праваабарончыя арганізацыі прызнавалі палітвязнямі.

Гэта Вітольд Ашурак, Мікалай Клімовіч, Алесь Пушкін, Вадзім Храсько, Ігар Леднік, Аляксандр Кулініч, Дзмітрый Шлетгаўэр.