Пракуратура Мінска выявіла факты продажу ў інтэрнэце нацысцкай сімволікі і “экстрэмісцкіх матэрыялаў”

13 траўня, Позірк. Пракуратура Мінска “выявіла факты продажу нацысцкай сімволікі і экстрэмісцкіх матэрыялаў” на адным з найбуйнейшых маркетплейсаў (не называецца).

Паводле інфармацыі прэс-службы нагляднага органа, гаворка ідзе пра абярэгі ў форме эмблемы “Чорнае сонца” (прызнаная нацысцкім сімвалам, разнавіднасцю “сонечнага кола”, якое выкарыстоўвалася ў нацысцкай Германіі і складаецца з дванаццаці радыяльных руг “Зіг”, падобных на сімвалы ў эмблеме СС), манеты Трэцяга рэйха з выявай на іх свастыкі, а таксама “экстрэмісцкія матэрыялы” ў выглядзе паштовых марак з выявай Адольфа Гітлера і кнігі Віктара Суворава “Бяру свае словы назад”, “Дзень. М”, “Ледакол”.

Адзначаецца, што закон “Аб недапушчэнні рэабілітацыі нацызму” забараняе публічна дэманстраваць (у тым ліку ў інтэрнэце), вырабляць і распаўсюджваць нацысцкую сімволіку.

Сталічная пракуратура таксама выявіла факты “публічнага дэманстравання нацысцкай сімволікі грамадзянамі ў каментарыях да пазначаных тавараў”.

Намеснік пракурора Мінска абавязаў уладальніка інтэрнэт-пляцоўкі ліквідаваць парушэнні.

17 красавіка паведамлялася, што ў дачыненні да 21-гадовага жыхара Івацэвічаў (Брэсцкая вобласць) узбуджаная крымінальная справа паводле ч. 1 арт. 130¹ КК (рэабілітацыя нацызму) за апраўданне дзеянняў нацыстаў у вёсцы Хатынь.

У 2021 годзе быў прыняты закон “Аб генацыдзе беларускага народа”. Пад беларускім народам у кантэксце дакумента “разумеюцца савецкія грамадзяне, якія пражывалі на тэрыторыі Беларускай Савецкай Сацыялістычнай Рэспублікі ў перыяд Вялікай Айчыннай вайны і (або) пасляваенны перыяд” (да 31 снежня 1951 года).

За “адмаўленне генацыду беларускага народа” арт. 130² КК прадугледжвае адказнасць у выглядзе 5 гадоў зняволення, за паўторнае парушэнне закона — ад 3 да 10 гадоў пазбаўлення волі.

Незалежныя гісторыкі і эксперты лічаць, што ўлады выкарыстоўваюць гэтую тэму для дыскрэдытацыі апанентаў. Пра гэта, у прыватнасці, сведчыць змест кнігі “Генацыд беларускага народа”, якая выйшла пад рэдакцыяй генеральнага пракурора Андрэя Шведа. У ёй сцвярджаецца, што масавыя пратэсты супраць фальсіфікацыі вынікаў прэзідэнцкіх выбараў 2020 года з’яўляюцца спробай дзяржаўнага перавароту з выкарыстаннем нацысцкай ідэалогіі. Акрамя таго, да генацыду фактычна прыраўнаваны антысавецкі супраціў у першыя пасляваенныя гады.