Прафесар Баркоўскі: Досвед барацьбы польскага руху “Салідарнасць” у пэўнай ступені можа быць перанесены на Беларусь

15 траўня, Позірк. Гістарычны досвед Польшчы ў 1980-я гады, калі барацьба руху “Салідарнасць” спачатку была задушаная, але потым дэмакратычныя сілы здолелі прыйсці ва ўладу, “не літаральна, але ў пэўнай ступені можа быць перанесены на сучасныя падзеі ў Беларусі”. Такую думку, адказваючы на пытанне “Позірку”, выказаў прафесар Інстытута філасофіі і сацыялогіі Польскай акадэміі навук, выканаўца абавязкаў прадстаўніка Аб’яднанага пераходнага кабінета па нацыянальным адраджэнні Павел Баркоўскі пасля прэзентацыі кнігі “Абуджэнне Беларусі. Штудыі з фенаменалогіі рэвалюцыі”, якая адбылася 15 траўня на базе згаданага інстытута.

Аўтарамі кнігі з’яўляюцца Павел Баркоўскі і прафесар інстытута Анджэй Гняздоўскі. Кніга надрукавана на польскай і беларускай мовах выдавецтвам навуковай установы.

Як адзначыў Баркоўскі, прыклад Польшчы паказвае, што “радыкальны ўздым грамадства не заўсёды адразу прыводзіць да вынікаў, часам трэба, каб адбыліся нейкія іншыя змены, каб народ прайшоў праз выпрабаванні, у выніку якіх ён атрымае свабоду і дэмакратыю”. Паводле слоў прафесара, палякі ў свой час прайшлі праз гэта: ваенны стан, рэпрэсіі, масавую міграцыю, але ў выніку пасля таго, як Савецкі Саюз пачаў здаваць пазіцыі, Польшча здолела стаць свабоднай еўрапейскай краінай і нават членам НАТО, аб чым палякі, якія пачыналі сваю барацьбу ў 1980 годзе, нават не маглі ўявіць у самых смелых снах.

Паводле слоў Баркоўскага, падчас напісання кнігі аўтары разлічвалі, каб яна “трапіла ў рукі не толькі спецыялістаў па філасофіі, гісторыі, паліталогіі ці сацыялогіі, але і простых чытачоў”. Мэта — каб яны ўбачылі там не толькі нейкія “страшныя тэрміны”, але і гісторыю і “паразважалі б на ідэйным узроўні, што стала прычынай тых падзей, пра якія ідзе гаворка ў кнізе, якія ў іх былі наступствы”. Аўтары спадзяюцца, что чытач паразважае і над тым, чаму яны разглядаюць рэвалюцыю ў грамадстве не толькі з палітычнага, але і з грамадска-філасофскага пункту гледжання, “як эвалюцыю свядомасці людзей”, якая не назіраецца, напрыклад, у Кыргызстане, які перажыў ужо некалькі рэвалюцый.

На прэзентацыі выступілі рэцэнзент кнігі доктар філасофіі Анджэй Вашкевіч, рэдактар беларускай версіі Пётр Рудкоўскі і былы міністр нацыянальнай абароны Польшчы (1992-1993 і 1997-2000), былы віцэ-прэзідэнт Еўрапейскага парламента (2004-2007) і актывіст “Салідарнасці” (у 1980-х — палітвязень) Януш Анышкевіч.

Падрабязнасці даступныя падпісчыкам “Позірк+”