Жыхар Магілёва напаў з нажом на міліцыянта, а пасля загінуў у аварыі падчас пагоні
16 траўня, Позірк. Пра здарэнне ў Магілёве, у выніку якога міліцыянт атрымаў сур’ёзнае параненне, а грамадзянін, які напаў на яго, загінуў у аўтамабільнай аварыі, паведаміла ўначы 16 траўня Міністэрства ўнутраных спраў.
Адзначаецца, што міліцыя атрымала паведамленне пра сямейна-бытавы канфлікт. Участковы інспектар, які прыбыў на месца, як вынікае з апублікаванага МУС фрагмента запісу яго відэарэгістратара, выклікаў нарад. Гэта не спадабалася мужчыну, які, напэўна, быў удзельнікам згаданага канфлікту. 61-гадовы жыхар Магілёва рэзка выцягнуў нож і ўдарыў міліцыянта “ў вобласць жывата”, пасля чаго пачаў уцякаць.
Інспектар, які атрымаў, як сцвярджаецца цяжкія цялесныя пашкоджанні, паспрабаваў дагнаць нападніка, але той, прыхапіўшы нож, з’ехаў на машыне.
“Неадкладна быў абвешчаны план “Перахоп”, — гаворыцца ў паведамленні. — Інспектары ДАІ выявілі падазронага, пачалася пагоня. На аўтадарозе М-8 “мяжа РФ — Віцебск — Гомель — мяжа Украіны” паблізу в. Вароніна Быхаўскага раёна мужчына не даў рады кіраванню, выехаў на абочыну — леваруч па ходзе руху, дзе сутыкнуўся з аўто, якое стаяла. У выніку ДТЗ пераследаваны загінуў”.
Мяркуючы з па апублікаваных кадраў, усё гэта адбылося ў дзённы ці вечаровы час, верагодна, 15 траўня.
Па факце “замаху на забойства супрацоўніка органаў унутраных спраў у сувязі з выкананнем ім абавязкаў па ахове грамадскага парадку” завялі крымінальную справу. Нягледзячы на тое, што нападнік памёр у выніку аварыі, МУС адзначыла, што санкцыя артыкула, паводле якога адкрытая справа, прадугледжвае пакаранне ў выглядзе пазбаўлення волі на тэрмін да 25 гадоў, пажыццёвага зняволення або смерці.
“Разбіральніцтва знаходзіцца на асабістым кантролі міністра ўнутраных спраў. Цяпер на месцы здарэння працуе следча-аператыўная група. Пацярпеламу міліцыянеру аказваецца ўся неабходная медыцынская дапамога”, — заявіла ведамства.
