Белстат: За чатыры месяцы рознічны тавараабарот павялічыўся на 10%

16 траўня, Позірк. У студзені — красавіку 2025 года рознічны тавараабарот склаў 31 млрд рублёў, павялічыўшыся на 10% у супастаўных цэнах да аналагічнага перыяду 2024-га, сведчаць даныя Нацыянальнага статыстычнага камітэта.

У студзені 2025-га рост складаў 12,5%, студзені — лютым — 10%, студзені — сакавіку — 10,8%.

У студзені 2024 года ён вырас на 9,9%, студзені — лютым і студзені — сакавіку — на 13%, студзені — красавіку — на 12,1%, студзені — траўні — на 12,2%, студзені — чэрвені — на 11,5%, студзені — ліпені — на 11,8%, студзені — жніўні — на 12%, са студзеня — верасня па студзень — снежань — па 11,8%.

Тавараабарот у сферы грамадскага харчавання за чатыры месяцы 2025-га вырас у гадавым выражэнні на 4,8% (у мінулым месяцы — на 5,5%) — да 2,1 млрд рублёў.

Рознічны тавараабарот арганізацый гандлю, на які прыпала 95,6% (за месяц не змяніўся) усяго рознічнага тавараабароту, вырас на 10,8% да 29,7 млрд рублёў (+11,6%).

Аптовы тавараабарот знізіўся на 3,4% да 58 млрд рублёў (-3,1%).

Як паведамляў “Позірк”, спажывецкія цэны ў красавіку 2025 года выраслі на 1%, ад пачатку года — на 3,8%, у гадавым вымярэнні — на 6,5%.

МАРГ пастановай № 4 ад 27 студзеня вызначыла паказчыкі штомесячнага (з нарастаннем) дапушчальнага павелічэння цэн: у студзені цэны не павінны былі вырасці больш, чым на 0,7% (па факце — +0,7%), па выніках студзеня — лютага — на 1,9% (+2%), студзеня — сакавіка — на 2,2% (+2,8%), студзеня — красавіка — на 2,7% (+3,8%).

Далей: студзеня — траўня — 3%, студзеня — чэрвеня — 3,3%, студзеня — ліпеня і студзеня — жніўня — 3,4%, студзеня — верасня — 3,7%, студзеня — кастрычніка — 4,1%, студзеня — лістапада — 4,4%, студзеня — снежня — 5%.