За апошнія пяць гадоў аб’ём складскіх запасаў прампрадукцыі вырас амаль удвая
17 траўня, Позірк. Па выніках студзеня — красавіка 2025 года аб’ём складскіх запасаў прамысловай прадукцыі ў грашовым выражэнні склаў у 11 млрд 166 млн 940 тыс. рублёў — у 1,99 раза больш, чым за аналагічны перыяд 2020-га (5 млрд 600 млн 248 тыс.), вынікае з праведзенага “Позiркам” аналізу даных Нацыянальнага статыстычнага камітэта.
Горшая дынаміка ў Брэсцкай вобласці, дзе зафіксаваны рост у 2,15 раза (з 652 млн 857 тыс. да 1 млрд 403 млн 458 тыс.); лепшая — адносна іншых рэгіёнаў — у Гродзенскай, дзе запасы выраслі ў 1,84 раза (з 779 млн 183 тыс. да 1 млрд 433 млн 667 тыс.).
Суадносіны запасаў да сярэднямесячнага аб’ёму выпуску за пяць гадоў павялічыліся з 79,1% да 79,8%.
