Большасць грамадзян Румыніі, якія галасавалі ў Беларусі, выбралі праеўрапейскага кандыдата

19 траўня, Позірк. Большасць грамадзян Румыніі, якія галасавалі ў Беларусі, на прэзідэнцкіх выбарах аддалі свае галасы незалежнаму праеўрапейскаму мэру Бухарэста Нікушору Дану, сведчыць праведзены “Позіркам” аналіз звестак, апублікаваных Пастаянным выбарчым органам Румыніі.

18 траўня на ўчастак, адкрыты ў румынскай амбасадзе ў Мінску (Калінінградскі завулак, 12), прыйшло 22 чалавекі. Дан атрымаў 18 галасоў (81,8%), яго супернік, ультраправы Джорджэ Сіміён — 4 (18,2%).

4 траўня ў першым туры ў румынскай дыпмісіі ў галасаванні ўзяло ўдзел 19 чалавек. Найбольшую колькасць галасоў — па 7 (36,8%) — атрымалі Сіміён і Джорджэ Антанеску (урадавы альянс “Румынія, наперад“). Дан з 3 галасамі (15,8%) заняў трэцяе месца. У бюлетэні было 11 кандыдатаў.

Святлана Ціханоўская павіншавала Дана з перамогай на выбарах. “Румыны выказаліся гучна і выразна — яны выбралі Еўропу, дэмакратыю і свабоду. Беларусы таксама бачаць сваю будучыню ў Еўропе. Я з нецярпеннем чакаю магчымасці працаваць з вамі над пабудовай адзінай Еўропы, якая нікога не пакіне без увагі“, — гаворыцца ў пасланні.

Аляксандр Лукашэнка, пакрыўджаны на Еўрасаюз і праеўрапейскіх палітыкаў за непрыманне ягонага рэжыму, перамогу Дана праігнараваў.