Лукашэнка ўсклаў на наймальнікаў адказнасць за працоўных мігрантаў

21 траўня, Позірк. Указ “Аб павышэнні ролі наймальнікаў у галіне знешняй працоўнай міграцыі”, які прадугледжвае адказнасць працадаўцаў за замежных работнікаў, падпісаў 21 траўня Аляксандр Лукашэнка, паведамляе яго прэс-служба.

Адзначаецца, што “для ўзмацнення патрабаванняў да прыцягнення замежнай працоўнай сілы, за выключэннем грамадзян дзяржаў — членаў ЕАЭС, на наймальнікаў ускладзеныя дадатковыя абавязкі”.

У ліку такіх абавязак наведваць мігрантаў дома — для “вывучэння ўмоў пражывання з прыняццем пры неабходнасці мер па выпраўленні выяўленых парушэнняў і інфармаваннем кампетэнтных дзяржаўных органаў”, а таксама арганізоўваць абавязковае тэставанне замежнікаў на веданне рускай або беларускай мовы.

“Заключаць працоўны дагавор з мігрантам неабходна будзе ў 30-дзённы тэрмін з даты яго ўезду ў Беларусь, — гаворыцца ў паведамленні прэс-службы Лукашэнкі. — Пры гэтым забараняецца часовы перавод такога работніка да іншага наймальніка, каб пазбегнуць выкарыстання яго працы без захавання вызначанай працэдуры прыцягнення замежных адмыслоўцаў”.

Наймальнікі таксама “будуць абавязаныя арганізоўваць кантроль за дзейнасцю і ўмовамі знаходжання мігрантаў”, у тым ліку вызначаць адказных за гэта асоб.

“Невыкананне сваіх абавязкаў пацягне для наймальнікаў адміністрацыйную адказнасць, а для мігрантаў — датэрміновае скасаванне працоўнага дагавора і выезд з краіны”, — адзначана ў паведамленні.

Тэкст указа пакуль не апублікаваны.

Мінск і Ісламабад дамовіліся выпрацаваць механізм для прыезду ў Беларусь працоўных мігрантаў з Пакістана, заявіў Аляксандр Лукашэнка 11 красавіка па выніках сустрэчы з пакістанскім прэм’ер-міністрам Шахбазам Шарыфам. Паводле яго слоў, Беларусь гатовая прыняць на працу 100–150 тыс. пакістанскіх адмыслоўцаў: “Тых галін, пра якія мы папросім”. “Кіраўніцтва Пакістана дапаможа нам падабраць такіх людзей”, — заявіў ён.

На суботніку 12 красавіка Лукашэнка адзначыў, што Беларусь зацікаўленая “перш за ўсё ў прыцягненні адмыслоўцаў, а не проста моладзі”. “І лепш — сем’ямі. Калі сям’я прыехала, яны працаваць будуць”, — падкрэсліў спікер, дадаўшы, што “падыход будзе дыферэнцыраваным”.

Пасля вяртання з Беларусі Шарыф заявіў журналістам, што “дасягнута дамоўленасць з Беларуссю пра накіраванне 150 тысяч кваліфікаваных пакістанскіх адмыслоўцаў, што будуць адабраныя выключна на падставе заслуг”.

25 красавіка Лукашэнка на нарадзе аб развіцці раёнаў Гомельскай вобласці, якія пацярпелі ў выніку катастрофы на ЧАЭС, заявіў, што “зацікаўленыя” хочуць “ўзрушыць беларускае грамадства” праблемай мігрантаў, у прыватнасці, тэмай прыезду ў Беларусь работнікаў з Пакістана.

23 красавіка Міністэрства ўнутраных спраў паведаміла, што выяўленыя “актыўныя правакатары, якія наўмысна спрабавалі нагнятаць абстаноўку ў краіне і маніпуляваць грамадскай думкай”, распаўсюджваючы інфармацыю пра ўезд у Беларусь 150 тыс. грамадзян Пакістана.

Паводле сцвярджэння ведамства, “міграцыйныя плыні з Пакістана адсутнічаюць, роўна як і злачынствы, здзейсненыя выхадцамі з гэтай дзяржавы”.

Пры гэтым падкрэслівалася, што на розных інтэрнэт-рэсурсах “працягвае распаўсюджвацца фэйкавая і правакацыйная інфармацыя на тэму ўезду ў Беларусь 150 тысяч грамадзян Пакістана, якія здзейснілі шэраг злачынстваў”.

“За распальванне міжнацыянальнай варожасці і дэстабілізацыю сітуацыі ў рэспубліцы будуць ужытыя самыя строгія меры адказнасці, аж да крымінальнай”, — прыгразіла МУС.

З 2021 года на межах Беларусі і краін ЕС цягнецца міграцыйны крызіс. У ліку тых, хто спрабуе нелегальна трапіць у краіны Еўрасаюза, маюцца і грамадзяне Пакістана.