Банкі, якія працуюць у Беларусі, абавязалі выпускаць карткі толькі з чыпам стандарту EMV

21 траўня, Позірк. Банкі, якія працуюць у Беларусі, абавязаныя выпускаць у абарачэнне карткі на фізічных носьбітах толькі з чыпам стандарту EMV, вынікае з пастановы Нацыянальнага банка ад 4 лютага 2025 года № 28, якая набывае моц з 22 траўня.

Дакумент уносіць змяненні ў інструкцыю аб ажыццяўленні аперацый з банкаўскімі карткамі і плацежнымі інструментамі, якія забяспечваюць іх выкарыстанне.

Новай рэдакцыяй, як адзначае рэгулятар, “канкрэтызаваныя пытанні кампраметацыі картак і плацежных інструментаў, якія забяспечваюць іх выкарыстанне, удакладнены парадак блакавання (разблакоўкі) плацежных інструментаў, у тым ліку па прычыне кампраметацыі”.

Таксама ўдакладненыя “пытанні, якія тычацца выпадкаў прызнання аперацый з выкарыстаннем картак неаўтарызаванымі”.

У адпаведнасці з пастановай банкі павінны забяспечыць “магчымасць выкарыстання шматфактарнага аўтэнтыфікацыі трымальнікаў картак пры ажыццяўленні аперацый у інтэрнэце”.

“Прадугледжана, што для інфармавання кліента аб праведзеных з выкарыстаннем карткі аперацыях банкі павінны будуць папярэдне атрымліваць згоду кліента на аказанне такой паслугі”, — адзначае Нацбанк.

Паводле зменаў у інструкцыі, банкі таксама абавязаныя будуць паведамляць кліентам аб “абмежаванні пераліку, сум і (або) колькасці аперацый, якія ажыццяўляюцца з выкарыстаннем картак”. Гэта ж тычыцца інфармацыі аб змене спісу краін і рэгіёнаў, у якіх уведзеныя абмежаванні на выкарыстанне картак. Цяпер такое інфармаванне ажыццяўляецца банкамі на добраахвотнай аснове.

“Да заключэння дагавора банк павінен будзе праінфармаваць кліента аб крымінальнай адказнасці за распаўсюджванне рэквізітаў картак або аўтэнтыфікацыйных даных, з дапамогай якіх магчыма атрыманне доступу да рахункаў (арт. 222 КК). Гэта дасць магчымасць павысіць дасведчанасць кліентаў, у тым ліку непаўналетніх, аб наступствах неправамерных дзеянняў з карткамі”, — звяртае ўвагу рэгулятар.

З 22 траўня банк-эмітэнт самастойна будзе вызначаць парадак дзеянняў са знойдзенымі карткамі, эмітаванымі гэтым банкам. “Пры вызначэнні названага парадку дзеянняў банк-эмітэнт прадугледжвае блакаванне такіх картак па сваёй ініцыятыве як скампраметаваных”, — гаворыцца ў паведамленні.

EMV — стандарт для пластыкавых карт, сумесна распрацаваны аплатнымі сістэмамі Europay, Mastercard і Visa. Назва EMV складзена з першых літар назваў гэтых кампаній. Павышаны ўзровень бяспекі карт стандарту EMV абумоўлены наяўнасцю убудаванага чыпа, які можа запускаць прыкладання і абменьвацца камандамі з касавымі тэрміналамі. Інфармацыя на чыпе абароненая, счытваць яе тэхнічна значна складаней, чым з магнітнай паласы.