Пасля “зваротаў грамадзян” КДК выявіў пратэрмінаваныя прадукты ў краме “буйной рэгіянальнай сеткі”

27 траўня, Позірк. Супрацоўнікі Камітэта дзяржаўнага кантролю выявілі ў адной з крамаў у Магілёўскай вобласці “парушэнні ў рэалізацыі харчовай прадукцыі”, паведамляе прэс-служба ведамства.

Адзначаецца, што гандлёвы аб’ект належыць “буйной рэгіянальнай гандлёвай сетцы”, яе назва не ўдакладняецца.

КДК падкрэслівае, што падставай для праверкі крамы сталі “звароты грамадзян”, якія паступілі ў чат-бот ведамства ў “Тэлеграме”, а таксама на тэлефонную “гарачую лінію” камітэта.

У паведамленні гаворыцца пра выяўленне больш як 10 кг мясных паўфабрыкатаў з пратэрмінаваным тэрмінам прыдатнасці, а таксама звыш 50 кг мясных і каўбасных вырабаў без маркіроўкі з указаннем такіх тэрмінаў. Акрамя таго, у продажы знаходзілася “пладова-агароднінная прадукцыя з прыкметамі псавання”.

Таксама пры праверцы ў дзвюх крамах Магілёва супрацоўнікі КДК устанавілі, што “гандлёвыя надбаўкі на асобныя віды гародніны і садавіны былі завышаныя на 10–52%”, а цыбуля і морква прадаваліся па цане “ў 2,5 раза вышэй за максімальна дазволеную”.

Пра ўстанаўленне фактаў рэалізацыі ў некаторых крамах Гомельскай вобласці прадукцыі з пратэрмінаваным тэрмінам прыдатнасці (ад аднаго дня да чатырох месяцаў) КДК паведамляў 5 траўня.

9 красавіка Міністэрства антыманапольнага рэгулявання і гандлю (МАРГ) паведаміла, што парушэнні заканадаўства аб гандлі выяўленыя ў 77% правераных крам раздробнай сеткі “Санта”, якая належыць ТАА “Санта Рытэйл”.

25 сакавіка КДК паведамляў, што падчас праверкі ў Іванаўскім і Івацэвіцкім раёнах Брэсцкай вобласці “ў адной з крамаў прадаваўся апельсінавы нектар, тэрмін прыдатнасці якога скончыўся 184 дзён таму, і працёртыя з цукрам яблыкі з мінулым 100 дзён таму тэрмінам прыдатнасці”.

7 сакавіка стала вядома, што парушэнні заканадаўства аб гандлі і абароне правоў спажыўцоў выяўленыя ва ўсіх правераных касметычных крамах касметыкі сеткі “Летуаль“, якая належыць ТАА “ЖэнціТрэйд“.

4 красавіка паведамлялася, што ва ўсіх правераных крамах рознічнай сеткі “7 пятніц“ (належыць ТАА “Юністар груп“) выяўленыя парушэнні заканадаўства аб гандлі і абароне правоў спажыўцоў.

10 сакавіка МАРГ паведаміў, што парушэнні правілаў гандлю ўстаноўленыя амаль у кожнай трэцяй праверанай краме сеткі “Табакерка“, якая належыць СЗАТ “Энерга-Оіл“.

28 лютага МАРГ інфармаваў аб парушэннях правілаў гандлю, устаноўленых ва ўсіх правераных крамах сеткі “Хіт!”, якая належыць ТАА “Еўрагандаль”.

20 лютага ведамства паказала на парушэнні ў 96% гандлёвых аб’ектаў рознічнай сеткі “Капеечка“.

Раней МАРГ выставіў маштабныя прэтэнзіі да інтэрнет-пляцоўкі “Вайлдберыз“ і гандлёвай сеткі “Суседзі“.

У 2024 годзе завышэнне гранічных гандлёвых надбавак устаноўлена ў 9,3% правераных КДК аб’ектаў, паведаміла раней начальнік упраўлення кантролю спажывецкага рынку, сферы паслуг і за абаротам падакцызных тавараў КДК Алена Масурноўская.

Усяго за год, паводле яе слоў, ведамства правяло праверкі і маніторынг 1.412 гандлёвых аб’ектаў. “Колькасць парушэнняў заканадаўства аб цэнах зніжаецца: у 2023 годзе такія парушэнні былі выяўлены ў 12% правераных магазінаў, а ў 2022-м — у кожным чацвёртым“, — адзначыла прадстаўнік КДК.