Ціханоўская падтрымала Зяленскага ў пытанні перамоваў на тэрыторыі Беларусі

28 траўня, Позірк. Прэзідэнт Украіны Уладзімір Зяленскі мае рацыю, адпрэчваючы прапанову Расіі аб правядзенні мірных перамоваў на тэрыторыі Беларусі, напісала дэмакратычны лідар Святлана Ціханоўская ў сваім акаўнце ў сацыяльнай сетцы X.

“Лукашэнка не з’яўляецца нейтральным гульцом — ён суагрэсар у вайне [прэзідэнта РФ Уладзіміра] Пуціна [супраць Украіны], — сцвярджае палітык. — Гэта (падтрымка вайны, — “Позірк”.) не воля беларусаў. Мы падтрымліваем вас і змагаемся за свабодную, мірную і дэмакратычную Беларусь“.

Некалькімі гадзінамі раней Зяленскі назваў немагчымым правядзенне перамоваў з РФ у Беларусі. Паводле яго, Кіеў разглядае ў якасці пляцовак для магчымых кантактаў па спыненні вайны Турцыю, Ватыкан і Швейцарыю. Ватыканскую пляцоўку, з ягоных слоў, “падтрымліваюць усе, акрамя расейскага боку“.

Свае пляцоўкі для перамоваў прапануюць Мальта і краіны Афрыкі, але Расея “на ўвесь гэты спектр перадала сігнал па Беларусі“, дадаў прэзідэнт Украіны.

Аляксандр Лукашэнка і прадстаўнікі яго рэжыму неаднаразова заяўлялі, што могуць прыняць у сябе перагаворныя дэлегацыі Украіны і РФ. Пры гэтым сваю ролю яны ацэньваюць супярэчліва, то выказваючы гатоўнасць стаць пасярэднікам, то катэгарычна ад гэтага адмаўляючыся.

24 лютага 2022 года Расія развязала поўнамаштабную вайну супраць Украіны, у якой афіцыйны Мінск падтрымлівае Крэмль. Нягледзячы на тое, што беларуская тэрыторыя і інфраструктура выкарыстоўваліся для нападу, некалькі раўндаў перамоваў паміж Масквой і Кіевам у пачатку вайны прайшлі менавіта ў Беларусі.

Пазней прадстаўнікі рэжыму ў Менску неаднаразова заяўлялі, што Беларусь павінна быць прадстаўленая на мірных перамовах паміж РФ і Украінай.