Еўракамісар па ўнутраных справах і міграцыі падтрымаў пазоў Літвы супраць Беларусі аб патрабаванні кампенсацыі за міграцыйны крызіс

28 мая, Позірк. Пра “ўсебаковую падтрымку” таго, што робіць Літва і іншыя дзяржавы — чальцы Еўразвязу ў пытанні вяртання сродкаў заявіў у інтэрв’ю агенцтву BNS еўракамісар унутраных спраў і міграцыі Магнус Брунэр 28 траўня падчас візіту ў Вільнюс.

“Важна, каб мы зрабілі ўсё магчымае, каб падтрымаць дзяржавы-члены ў пошуку падыходных рашэнняў, іх адаптацыі да цяперашняй сітуацыі”, — сказаў ён.

“Мы спрабуем зрабіць усё гэта з дапамогай рэалізацыі Пакта [аб міграцыі і прытулку], з дапамогай сістэмы вяртання [мігрантаў], з дапамогай канцэпцыі бяспечнай трэцяй краіны“, — падкрэсліў еўрачыноўнік.

Літва патрабуе ад Беларусі больш за 200 млн еўра ў якасці кампенсацыі шкоды, нанесенай міграцыйным крызісам. Гэтая сума значыцца ў пазове, які Вільнюс падала 19 траўня ў Міжнародны суд (МС) ААН.

У Міністэрстве замежных спраў Польшчы заявілі, што Варшава разглядае магчымасць далучыцца да згаданага пазову Літвы.

Да такога кроку Польшчу, Латвію і іншыя краіны заклікала, у прыватнасці, беларускі дэмакратычны лідар Святлана Ціханоўская.

22 траўня лідары дзевяці дзяржаў ЕС (Аўстрыі, Бельгіі, Даніі, Італіі, Латвіі, Літвы, Польшчы, Чэхіі і Эстоніі) апублікавалі адкрыты ліст, які заклікае пераасэнсаваць тлумачэнне Еўрапейскай канвенцыі аб правах чалавека, асабліва ў пытанні міграцыі. Бакі выказалі імкненне да“новай і адкрытай дыскусіі па тлумачэнні Еўрапейскай канвенцыі аб правах чалавека”.

Пра тое, што Літва накіравала заяву ў МС ААН аб парушэнні Беларуссю сваіх абавязацельстваў у рамках пратакола супраць незаконнага ўвозу мігрантаў па сушы, моры і паветры ад 15 лістапада 2000 года, які дапаўняе Канвенцыю ААН супраць транснацыянальнай арганізаванай злачыннасці, стала вядома 19 траўня.

“Літва разглядае гэтыя дзеянні як наўмысную спробу беларускага рэжыму выкарыстоўваць міграцыю як сродак палітычнага ціску на Літву і Еўрапейскі саюз у адказ на іх падтрымку беларускай дэмакратыі і санкцыі за парушэнні правоў чалавека“, — падкрэсліваецца ў заяве.

Вільнюс патрабуе “поўную кампенсацыю прычыненай шкоды, уключаючы выдаткі на будаўніцтва плота, і гарантыі таго, што дзеянні, якія супярэчаць міжнароднаму праву, не паўторацца”.

Міграцыйны крызіс на межах Беларусі з краінамі ЕС працягваецца з вясны 2021 года.

Паводле звестак на 26 траўня, з пачатку 2025 года Літва спыніла 745 спробаў парушэння мяжы з беларускай тэрыторыі (у траўні — 181). На долю гэтай балтыйскай дзяржавы, паводле падлікаў “Позірку“, прыпала 5,4% спробаў пранікнення, якія нелегалы робяць на мяжы Беларусі і краін ЕЗ (на долю Латвіі — 27,77%, Польшчы — 66,83%).