У Івацэвіцкім раёне два чалавекі загінула ў аўтааварыі ў ноч на 31 траўня

31 траўня, Позірк. Смяротная аўтамабільная аварыя здарылася ў ноч на 31 траўня ў Івацэвіцкім раёне (Брэсцкая вобласць), паведамляе прэс-служба Міністэрства ўнутраных спраў.

Паводле папярэдняй інфармацыі, каля 2:20 на дарозе Н-26414 (Волька — Дабрамысль) непадалёку ад вёскі Закаплічча 28-гадовы мужчына, у якога, як высветлілася не было правоў кіроўцы, не даў рады кіраванню — аўтамабіль “Форд” урэзаўся ў дрэва.

Кіроўца і 29-гадовы пасажыр загінулі на месцы. Яшчэ адзін пасажыр — 25-гадовы — шпіталізаваны. Ніхто з іх, згодна з данымі МУС, не быў прышпілены рамянямі бяспекі.

Ведамства нагадала, што кіраваць транспартным сродкам без пасведчання кіроўцы забаронена, а ўсе, хто знаходзіцца ў аўтамабілі, павінны быць прышпіленыя.