Беларусы і італьянцы застануцца “добрымі партнёрамі”, нягледзячы на ”геапалітычную сітуацыю”, лічыць Лукашэнка
2 чэрвеня, Позірк. Стасункі паміж беларусамі і італьянцамі з’яўляюцца “прыкладам шчырага сяброўства, якое мае трывалы падмурак”, заявіў Аляксандр Лукашэнка, віншуючы 2 чэрвеня народ Італіі з Днём абвяшчэння рэспублікі.
“Разам мы здолелі пабудаваць моцныя і шматгранныя сувязі ў розных сферах, — прыводзіць тэкст паслання прэс-служба віншавальніка. — Упэўнены, нягледзячы на геаграфічную адлегласць і складаную геапалітычную сітуацыю, мы застанемся добрымі партнёрамі, зацікаўленымі ў падтрыманні і развіцці ўсебаковай супрацы”.
Паводле слоў Лукашэнкі, для беларусаў Італія — гэта “перш за ўсё краіна з унікальнай гісторыяй і непаўторнай культурай, багатай прыродай, адкрытымі і гасціннымі людзьмі, неабыякавымі да чужой бяды”.
Віншуючы італьянцаў з гэтай жа нагоды год таму, Лукашэнка заяўляў, што Беларусь і Італія шмат гадоў “паспяхова супрацоўнічаюць па шырокім спектры напрамкаў, уключаючы гуманітарныя кантакты, эканоміку, культуру і адукацыю”. Ён сцвярджаў, што беларусы і італьянцы, “нягледзячы на няпростую кан’юнктуру”, працягваюць “разам працаваць і сябраваць, садзейнічаючы ўзаемаразуменню і дыялогу ў Еўропе”.
Пасля падзей 2020 года Лукашэнка віншуе са святамі народы краін, кіраўнікоў якіх лічыць варожымі свайму рэжыму. Беларускія ўлады ўключылі італьянскую дзяржаву ў спіс “недружалюбных краін”. Еўрасаюз, часткай якога з’яўляецца Італія, не прызнаў вынікі прэзідэнцкіх выбараў у Беларусі ў 2020 і 2025 гадах, увёў санкцыі супраць афіцыйнага Мінска.
Дыпламатычныя стасункі паміж краінамі ўсталяваныя ў 1992 годзе. Тады ж у Мінску была адкрыта амбасада Італіі. У 1993 годзе ў Рыме пачало працаваць генеральнае консульства Беларусі.
У 2021 годзе тавараабарот паміж Беларуссю і Італіяй склаў 941,9 млн долараў, з якіх 786 млн прыйшліся на беларускі імпарт. Мінск пастаўляў трубы і бясшвовыя профілі з чорных металаў, дрот з нелегіраванай сталі, лесаматэрыялы, сінтэтычныя валокнамі ды інш. У зваротным напрамку ішлі лекі, машыны і механічныя ўстройствы спецпрызначэння, запасныя часткі для аўтамабіляў і трактароў, арматура для трубаправодаў, вінаградныя віны (уключаючы сусла) ды інш.
Пасля расійскага ўварвання ва Украіну і ўзмацнення санкцый тавараабарот значна паменшыўся. Актуальныя даныя ўзаемнага гандлю ў афіцыйных беларускіх крыніцах адсутнічаюць.
Разам з тым, паводле інфармацыі аналітычнай кампаніі Trading Economics (штаб-кватэра ў Нью-Ёрку), якая абапіраецца на даныя Статыстычнага ўпраўлення ААН, у 2024 годзе ўзаемны гандаль паміж Мінскам і Рымам склаў 425,96 млн долараў (экспарт Беларусі — 29,25 млн, італьянскія пастаўкі — 396,71 млн).
