Эстонія выходзіць з дагавора з Беларуссю аб пазбяганні двайнога падаткаабкладання

4 чэрвеня, Позірк. Урад Эстоніі падтрымаў прапанову міністра замежных спраў Маргуса Цахкны аб спыненні дзеяння дагавора з Беларуссю аб пазбяганні двайнога падаткаабкладання і прадухіленні ўхілення ад выплаты падаткаў.

Паводле слоў Цахкны, якія прыводзіць прэс-служба эстонскага ўрада, дэнансацыя пагаднення — “гэта сігнал аб тым, што кампаніі і рэзідэнты краіны, якая ўдзельнічае ў агрэсіўнай вайне, не атрымаюць падатковых ільгот у Эстоніі”.

“З 2022 года Беларусь удзельнічае ў агрэсіўнай вайне Расіі супраць Украіны і тым самым парушае нормы, якія з’яўляюцца асновамі міжнароднага права. Падобным дзеянням неабходна супрацьстаяць усімі спосабамі. Акрамя іншых захадаў, мы таксама зробім гэта, спыніўшы дзеянне двухбаковага дагавора аб пазбяганні двайнога падаткаабкладання”, — сказаў кіраўнік МЗС Эстоніі.

Цахкна нагадаў аб аналагічным рашэнні, прынятым Беларуссю ў аднабаковым парадку, адзначыўшы, што пагадненне не прадугледжвала “магчымасці прыпынення”.

“Улічваючы агульную колькасць падаткаплацельшчыкаў, скасаванне пагаднення закранае адносна невялікую колькасць асоб, у першую чаргу рэзідэнтаў Беларусі, якія атрымліваюць пенсіі з Эстоніі. На сённяшні дзень у Беларусі працуе вельмі мала эстонскіх кампаній”, — падкрэсліў міністр.

Паведамляецца, што ў выпадку праходжання ўсіх прававых працэдур пагадненне спыніць дзеянне ў Эстоніі з 1 студзеня 2026 года.

7 сакавіка 2024 года Савет міністраў Беларусі прыняў пастанову № 164 “Аб пытаннях падаткаабкладання”, якая ў тым ліку прыпыніла да канца 2026 года “выкананне палажэнняў міжнародных пагадненняў аб пазбяганні двайнога падаткаабкладання” ў дачыненні да 27 краін Захаду.

У лютым 2025 года Літва апавясціла Мінск аб дэнансацыі дагавора аб пазбяганні двайнога падаткаабкладання і фіскальных парушэнняў, дакумент страціць сілу з 1 студзеня 2026 года.

У гэтым жа месяцы аб прыпыненні дзеяння аналагічнага пагаднення з Беларуссю паведаміла Вялікабрытанія.