Лукашэнка трэці год запар запрашае ў Мінск прэзідэнта Мазамбіка

25 чэрвеня, Позірк. Аляксандр Лукашэнка пацвердзіў гатоўнасць прыняць прэзідэнта Мазамбіка Даніэла Франсішку Шапу ў Мінску або наведаць Мапуту з афіцыйным візітам для “прадметных перамоў па ўсім комплексе пытанняў двухбаковага і міжнароднага парадку дня“. Сваім пажаданні Лукашэнка выклаў у віншаванні Шапу і ўсіх грамадзян гэтай краіны з Днём незалежнасці.

“Пяцьдзесят гадоў таму мазамбікцы адстаялі ўласны шлях развіцця (абвяшчэнне ў 1975 годзе незалежнасці ад Партугаліі на фоне вострага палітычнага крызісу ў метраполіі. — “Позірк”.). Мне прыемна адзначыць, што ў вызваленчай барацьбе за раўнапраўе і справядлівасць, станаўленні дзяржавы і абнаўленні яго эканомікі сваім мазамбікскім сябрам дапамагалі і беларусы“, — цытуе віншаванне прэс-служба Лукашэнкі. На яго думку, памяць пра тыя знамянальныя падзеі “адкрывае новыя магчымасці для міждзяржаўнага ўзаемадзеяння на карысць нашых народаў“.

Беларусь надае вялікую ўвагу ўмацаванню трывалых адносін з Мазамбікам, адзначыў палітык: “Улічваючы паспяховы досвед рэалізацыі сумесных праектаў з афрыканскімі партнёрамі, мы гатовыя прапанаваць Мазамбіку супрацоўніцтва ў сферах механізацыі сельскай гаспадаркі, забеспячэння харчовай бяспекі, прамысловасці, адукацыі і іншых галінах“.

Тры гады запар у адпаведным віншаванні Лукашэнка кліча кіраўніка Мазамбіка ў Мінск. Раней ён двойчы безвынікова запрашаў Філіпе Жасінту Ньюсі, які раней займаў пасаду прэзідэнта гэтай афрыканскай краіны.

Шапу ўступіў на пасаду прэзідэнта 15 студзеня 2025 года. Вынікі выбараў прэзідэнта, якія прайшлі ў Мазамбіку ў кастрычніку 2024 года, былі пастаўлены пад сумнеў Епіскапальнай канферэнцыяй Мазамбіка і Еўрапейскім саюзам, а ў краіне ўспыхнулі масавыя пратэсты.

Дыпламатычныя адносіны паміж Беларуссю і Мазамбікам былі ўстаноўленыя 29 лютага 2000 года. Узаемны гандаль нязначны. Паводле інфармацыі беларускага МЗС, аб’ём узаемнага гандлю ў 2021 годзе склаў 1,523 млн долараў (беларускі экспарт — 1,18 млн, мазамбікскія пастаўкі — 0,343 млн), 2020-м — 159 тыс. (толькі беларускі экспарт). Актуальных звестак у адкрытым доступе няма.

У Мазамбіку пражывае каля 34 млн чалавек. Валавы ўнутраны прадукт на душу насельніцтва ў 2022 годзе быў амаль у 14 разоў меншы, чым у Беларусі — 581 долар супраць 7.888.

Мазамбікскі экспарт у 2023 годзе склаў амаль 10,1 млрд долараў, імпарт — 8,3 млрд.

Найбольш прадаванымі на знешні рынак таварамі былі каменны вугаль (21% усяго аб’ёму экспарту; 1,76 млрд долараў), газы нафтавыя і вуглевадароды (20%; 1,72 млрд), газы нафтавыя і вуглевадароды газападобныя (13,2%; 1,09 млрд), неапрацаваны алюміній (7,95%; 658 млн), электраэнергія (5,61%; 464 млн).

Мазамбікскую прадукцыю ў асноўным спажывалі Індыя (доля — 15,6%; 1,29 млрд), Кітай (14,2%; 1,17 млрд), пар (13,9%; 1,15 млрд), Паўднёвая Карэя (5,63%; 466 млн), Вялікабрытанія (4,83%; 399 млн).

Галоўнымі імпартнымі таварамі сталі: нафта і нафтапрадукты (21%; 2,15 млрд), рэактары ядзерныя, катлы, абсталяванне і механічныя прылады (11,3%; 1,14 млрд), наземны транспарт, акрамя чыгуначнага або трамвайнага (7,33%; 740 млн), злакі (6,85%; 692 млн), электрамашыны і абсталяванне, гуказапісвальная і гукаўзнаўляльная апаратура, апаратура для запісу і прайгравання тэлевізійнага малюнка і гуку, іх часткі і прылады (6,44%; 650 млн).

Амаль чвэрць імпартаваных тавараў была з ПАР (23%; 2,33 млрд). Сярод найбуйнейшых пастаўшчыкоў таксама Кітай (15,3%; 1,55 млрд), ААЭ (10,3%; 1,04 млрд), Індыя (7,99%; 807 млн) і Сінгапур (6,11%; 616 млн).