Беларусь і ААЭ заснавалі падкамітэт па інвестыцыях

27 чэрвеня, Позірк. Міжурадавае пагадненне аб гандлі паслугамі і ажыццяўленні інвестыцый падпісалі 27 чэрвеня ў Мінску Беларусь і Аб’яднаныя Арабскія Эміраты.

Подпісы пад дакументам паставілі намеснік прэм’ер-міністра Беларусі Наталля Пяткевіч і дзяржаўны міністр па пытаннях знешняга гандлю ААЭ Тані бен Ахмед Аль Зейудзі, які знаходзіцца ў Мінску.

ДзяржСМІ паведамляюць, што асноўнымі мэтамі пагаднення з’яўляюцца “ўстанаўленне рамачных правілаў гандлю паслугамі, садзейнічанне інвестыцыйнай дзейнасці і пашырэнне гандлю паміж Беларуссю і ААЭ”. На ўзаемнай аснове “замацоўваюцца гарантыі захавання празрыстых і стабільных умоў гандлю паслугамі, фіксуюцца выразныя ўмовы вядзення дзейнасці ў розных сектарах (з улікам патрабаванняў дзеючага заканадаўства)“. Ствараюцца “дадатковыя механізмы ўзаемадзеяння паміж краінамі ў галіне інвестыцыйнага супрацоўніцтва, засноўваецца падкамітэт па інвестыцыях“.

9 чэрвеня стала вядома, што Аляксандр Лукашэнка ўхваліў праект Пагаднення аб эканамічным партнёрстве Еўразійскага эканамічнага саюза з ААЭ. Чакаецца, што яно будзе падпісана 27 чэрвеня ў Мінску, дзе адбудзецца пасяджэнне Вышэйшага Еўразійскага эканамічнага савета. Падобнае пагадненне ЕАЭС мае з Кітаем.