Ціханоўская — Трампу: 4 ліпеня мы святкуем вечную сілу свабоды і веру ў тое, што людзі могуць вызначаць свой лёс

4 ліпеня, Позірк. “4 ліпеня мы святкуем вечную сілу свабоды і веру ў тое, што людзі могуць вызначаць свой лёс”, — напісала Святлана Ціханоўская ў віншаванні прэзідэнту ЗША Дональду Трампу і амерыканскаму народу з Днём незалежнасці.

“Беларусы падзяляюць адну і тую ж мару: жыць у свабоднай і суверэннай краіне. Гэта тое, за што мы змагаемся”, — падкрэсліла беларускі дэмакратычны лідар.

У траўні 2025 года падчас візіту ў ЗША Ціханоўская заявіла, што ў яе ёсць дзве просьбы да Трампа: “Першая — дапамагчы вызваліць усіх палітвязняў у Беларусі. Я б сказала, што для ЗША гэта даволі лёгка зрабіць, але нам патрэбна паслядоўнасць і прынцыповая пазіцыя. Другое — быць міратворцам не толькі для Украіны, але і для Беларусі. Нам патрэбны моцны пасярэднік паміж беларускім народам і рэжымам. Мы хочам мірнай змены ўлады. Нам патрэбныя свабодныя і дэмакратычныя выбары ў Беларусі”.

21 чэрвеня, у дзень візіту ў Мінск спецпрадстаўніка Трампа па Украіне Кіта Келага, было вызвалена і вывезена ў Літву 14 зняволеных, у тым ліку муж дэмлідара Сяргей Ціханоўскі.

4 ліпеня з Днём незалежнасці Трампа павіншаваў Аляксандр Лукашэнка. Ці віншаваў Трамп Лукашэнку з Днём незалежнасці 3 ліпеня, невядома.