6 ліпеня, Позірк. З Днём дзяржаўнасці павіншавала Літву 6 ліпеня беларускі дэмакратычны лідар Святлана Ціханоўская.
“Сёння адзначаецца каранацыя Міндоўга — першага вялікага князя Літоўскага, — напісала палітык на сваёй старонцы ў сацыяльнай сетцы X. — Беларусы ганарацца агульнай спадчынай і глыбока ўдзячныя Літве за сяброўства і падтрымку ў нашай барацьбе за свабоду”.
Літоўская гістарыяграфія называе Міндоўга вялікім князем з чацвёртага дзесяцігоддзя XIII стагоддзя, а строга з 6 ліпеня 1253 года да смерці ў 1263-м — каралём Літвы (з лат. — rex Lethowiae). У гістарычных дакументах Міндоўг да каранацыі, як правіла, называўся князем, у хроніках, што з’явіліся пазней, дзе апісваецца перыяд праўлення да станаўлення каралём, — вялікім князем (тытул, што замацаваўся за яго нашчадкамі, якія не атрымалі ў спадчыну каралеўскі тытул). Канкрэтная дата каранацыі ў крыніцах па-за межамі Літвы ў асноўным не пазначаецца, толькі год — 1253-й.
Пасля прэзідэнцкіх выбараў 2020 года ў Беларусі Літва стала адной з асноўных краін, у якую тысячы беларусаў пераехалі, ратуючыся ад рэпрэсій. У Вільнюсе месціцца Офіс беларускага дэмакратычнага лідара Святланы Ціханоўскай.
Беларусы з’яўляюцца другой паводле колькасці ўладальнікаў дазволу на пражыванне нацыянальнай групай у Літве, саступаючы толькі ўкраінцам. Разам з тым, паводле даных Дэпартамента міграцыі, пасля значнага росту іх колькасць у апошні час скарачаецца. Калі на 1 студзеня 2023 года літоўскі ДНЖ мела 48.804 грамадзяніны Беларусі, 1 студзеня 2024-га 62.167, то на 1 студзеня 2025-га — 57.511, 1 траўня — 53.284, 1 чэрвеня — 52.662, 1 ліпеня — 52.287.
