Праваабаронца Кісляк просіць генпракурора Грузіі распачаць следства па факце затрымання грамадзяніна Беларусі ў Дэпартаменце міграцыі МУС
Дэпартамент міграцыі МУС Грузіі
15 ліпеня, Позірк. Распачаць следства па факце затрымання грамадзяніна Беларусі ў Дэпартаменце міграцыі МУС Грузіі заклікаў генеральнага пракурора гэтай краіны брэсцкі праваабаронца Раман Кісляк.
Беларус (імя рэдакцыі вядомае, пакуль не апублікуецца з меркаванняў бяспекі) быў затрыманы 14 ліпеня ў будынку дэпартамента, куды ён прыйшоў падаць заяву на атрыманне прытулку.
“У 16.35 (далей імя і прозвішча заяўніка. — “Позірк”.) увайшоў у Дэпартамент міграцыі. <…> У дэпартаменце у (імя, прозвішча. — “Позірк”.) прынялі заяву, але праз некаторы час прынеслі гэтую заяву назад і сказалі, што не могуць яе зарэгістраваць, прапанавалі прыйсці на наступны дзень. Па выхадзе з дэпартамента міграцыі (імя. — “Позірк”.) затрымалі супрацоўнікі МУС і ўжо як затрыманага прывялі ў дэпартамент міграцыі, заключылі пад варту і змясцілі ў турму для мігрантаў“, — гаворыцца ў заяве Кісляка на імя генпракурора.
Праваабаронца інфармуе адрасата, што па стане на 13.00 15 ліпеня ад затрыманага яшчэ не прынялі заяву на статус уцекача. Гэта стала вядома ад сяброўкі беларуса, якая наведала яго ў ізалятары 15 ліпеня. “Супрацоўнікі дэпартамента міграцыі ў гэты дзень не пусцілі мяне ў ізалятар, нібыта таму што ў адзін дзень можа быць адно наведванне затрыманага адным наведвальнікам“, — паведамляе праваабаронца.
У заяве ён просіць прыцягнуць да адказнасці за перавышэнне паўнамоцтваў службовых асоб МУС. Пры гэтым Кісляк згадвае пра кейс іншага грамадзяніна Беларусі Яўгена Муравіцкага, у якога не прынялі заяву на міжнародную абарону (Муравіцкі быў затрыманы ў канцы лістапада 2024 года ў Тбілісі на акцыі пратэсту супраць згортвання курсу Грузіі на еўраінтэграцыю, яго два дні пратрымалі ў СІЗА, пасля чаго ён вылецеў у Літву з-за боязі быць затрыманым зноў).
Праваабаронца просіць генпракурора “прыняць меры да спынення практыкі адвольных адмоваў у прыняцці заяў на міжнародную абарону і практыкі адвольных затрыманняў супрацоўнікамі МУС пасля такіх адмоваў”.
