У Гомельскай вобласці 17 ліпеня пройдзе чарговая праверка сістэмы апавяшчэння насельніцтва
16 ліпеня, Позірк. У Гомельскай вобласці 17 ліпеня пройдзе планавая тэхнічная праверка сістэмы апавяшчэння насельніцтва, паведамляе прэс-служба Міністэрства па надзвычайных сітуацыях.
“Захоўвайце спакой! Ніякіх дзеянняў не патрабуецца!” — заклікае МНС.
Аб правядзенні 17 ліпеня ў Светлагорску (Гомельская вобласць) “комплекснай праверкі аўтаматызаванай сістэмы цэнтралізаванага апавяшчэння грамадзянскай абароны раёна” паведамляў тэлеграм-канал мясцовага райвыканкама.
Раней у гэтым годзе праверкі сістэмы апавяшчэння праводзіліся ў Беларусі на абласным узроўні: 8 і 22 красавіка, 27 траўня, 10 і 30 чэрвеня, 8 ліпеня — на тэрыторыі Брэсцкай вобласці, 16 красавіка і 11 чэрвеня — Мінскай, 30 студзеня, 20 сакавіка, 19 чэрвеня — Гомельскай.
15–17 красавіка праверка праводзілася ў Магілёве.
13 сакавіка планавая праверка сістэмы апавяшчэння прайшла па ўсёй Беларусі.
Пра прычыны такіх частых праверак сістэм апавяшчэння МНС не паведамляе. Разам з тым звяртае на сябе ўвагу той факт, што праверкі праводзяцца ў тым ліку ў абласцях, якія мяжуюць з Украінай, куды рэгулярна ўрываюцца беспілотныя лятучыя апараты, якія, як мяркуецца, належаць Расіі.
У Беларусі зафіксавана некалькі выпадкаў падзення дронаў на будынкі, аднак інфармацыі пра тое, што пры гэтым актывавалася сістэма апавяшчэння, няма.
З пачатку поўнамаштабнай вайны РФ супраць Украіны праверкі сістэм апавяшчэння сістэматычна праходзяць, напрыклад, у Літве, Польшчы, Чэхіі. Для гэтага выкарыстоўваюцца рэпрадуктары на вуліцах, праз якія перадаецца паведамленне і гучыць сірэна.
