Беларусі заяўлены пратэст праз эскалацыю сітуацыі на мяжы — кіраўнік МУСіА Польшчы

17 ліпеня, Позірк. У Варшаве “вельмі сур’ёзна” ўспрымаюць інцыдэнт, які адбыўся 15 ліпеня, калі ў бок Польшчы праз агароджу на мяжы з Беларуссю кінулі бутэльку з запальнай сумессю, заявіў 17 ліпеня ў эфіры “Радыё 1” польскі міністр унутраных спраў і адміністрацыі Томаш Сямоняк.

“Без беларускіх спецслужбаў гэтага б не адбылося, і мы будзем рашуча пратэставаць, — цытуе чыноўніка польскае агенцтва Wprost. — Таму што Беларусь нясе адказнасць за тое, што адбываецца з яе боку, і гэтая сітуацыя — яўная спроба правакацыі, спроба распаліць абстаноўку”.

“Я абмеркаваў здарэнне з міністрам замежных спраў Радославам Сікорскім, і мы зробім адпаведныя захады. Я не хачу забягаць наперад. Памежная служба на ўзроўні ўпаўнаважаных ужо заявіла беларускаму боку рашучы пратэст”, — сказаў ён.

Міністр падкрэсліў, што “падобныя сітуацыі непрымальныя”. Паводле яго слоў, “на шчасце, тут ніхто не пацярпеў, але нядаўнія выпадкі — гэта эскалацыя”.

“Магчыма, яны (улады ў Мінску. — “Позірк”.) лічаць, што, увёўшы памежны кантроль з Германіяй і Літвой, мы адмовімся ад Беларусі. Мы не адмовімся: сілы засталіся ранейшымі, усё працуе выдатна, і няма ніякіх парушэнняў мяжы”, — сцвярджае Сямоняк.

Пры гэтым ён падкрэсліў, што мяжа знаходзіцца ў бяспецы: “Узмоцненыя патрулі, 11.000 афіцэраў і салдат пастаянна знаходзяцца ў стане баявой гатоўнасці. Супрацоўнікі паліцыі ў Беластоку таксама гатовыя да выезду на мяжу ў выпадку неабходнасці”.

Згодна з праведзеным “Позіркам” аналізам, ад пачатку года Польшча прадухіліла 16,3 тыс. спробаў незаконнага пранікнення мігрантаў з беларускай тэрыторыі, у тым ліку за 16 ліпеньскіх дзён — 1,7 тыс.

16 ліпеня міністр нацыянальнай абароны краіны Уладзіслаў Касіняк-Камыш таксама заявіў пра нарастанне агрэсіі з боку мігрантаў, якія спрабуюць трапіць у Польшчу з беларускай тэрыторыі.

“Агрэсія на ўсходняй мяжы ўзмацняецца. Салдаты зазнаюць напады не толькі з камянямі, але і з бутэлькамі, напоўненымі гаручымі вадкасцямі. Кожны такі напад — гэта напад на польскую дзяржаву”, — адзначыў чыноўнік.

Кіраўнік ваеннага ведамства таксама нагадаў пра магчымасці прымянення зброі ў дачыненні да агрэсіўных мігрантаў. “Менавіта таму мы змянілі закон: цяпер салдаты маюць дакладныя правілы выкарыстання зброі і поўную прававую абарону. Яны могуць не баяцца рашучых дзеянняў, абараняючы Польшчу”, — падкрэсліў ён.

Прэс-сакратар міністэрства ўнутраных спраў і адміністрацыі Яцэк Дабжыньскі ў сваю чаргу паведаміў, што 15 ліпеня пасля 22:00 “супрацоўнікі і салдаты памежнай службы зазналі напад з боку асоб, якія знаходзіліся па той бок загароды”.

“На абаронцаў нашай мяжы абрынуўся град камянёў, а адзін з нападнікаў кінуў у іх бутэльку з запальнай сумессю, — адзначыў прадстаўнік МУСіА. — Кінутая бутэлька разбілася аб дарогу, а вадкасць, якая вылілася, загарэлася. На шчасце, ніхто не пацярпеў. Падчас аперацыі былі затрыманыя 10 замежнікаў (пяцёра грамадзян Афганістана і пяцёра грамадзян Эрытрэі), якія застаюцца ў распараджэнні Памежнай аховы”.

“Гэты інцыдэнт абуральны і непрымальны. Перакананы, што ён не мог адбыцца без ведама і згоды беларускіх спецслужбаў. Уся адказнасць за гэты інцыдэнт ляжыць на Беларусі, якая ўжо некалькі гадоў вядзе агрэсіўныя дзеянні на гэтым участку мяжы”, — напісаў Дабжыньскі на сваёй старонцы ў сацсетцы Х.

Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.