Жыхары пацярпелага ад непагадзі Гарадоцкага раёна маюць патрэбу ў вопратцы, абутку, сродках гігіены

20 ліпеня, Позірк. Жыхары пацярпелага ад непагадзі Гарадоцкага раёна (Віцебская вобласць) маюць патрэбу ў гуманітарнай дапамозе, вынікае з паведамлення ў сацсетках аднаго з валанцёрскіх праектаў.

Адзначаецца, што мясцовыя жыхары адчуваюць недахоп мужчынскіх рэчаў — адзення і абутку. Гаворка пра гумовыя боты, красоўкі, туфлі і інш. Асобна згадваецца аб патрэбнасці ў вопратцы вялікіх памераў.

Таксама валанцёры просяць перадаць будматэрыялы: фарбы, лакі, шпатлёўку, плітку і інш.

Неабходныя сродкі гігіены — шампунь, мыла, зубная паста і шчоткі, крэм для рук, “жаночая гігіена”, а таксама посуд, бытавыя прыборы, пасцельная бялізна.

Раней МНС паведамляла, што навальнічны фронт з парывамі ветру да 23 метраў за секунду, які прайшоў па Віцебскай вобласці 9 ліпеня (17:00–18:00), пашкодзіў 29 будынкаў у Гарадоцкім раёне.

Паводле інфармацыі ведамства, былі пашкоджаныя дахі 27 прыватных жылых дамоў і дзвюх крам у вёсцы Вархі.

“На месца НС выехала 8 адзінак тэхнікі МНС, працуюць службы рэагавання раёна. У выніку стыхіі ніхто не пацярпеў, вядзецца маніторынг сітуацыі”, — адзначала прэс-служба Міністэрства.

Тэлеграм-канал пра надвор’е “Метэавайб” адзначаў, што ў вёсцы Вархі “меркавана прайшоў магутны смерч, катэгорыя ўдакладняецца”.

“Паваленыя не толькі дрэвы, але і знесеныя дахі будынкаў і нават сцены дамоў. Цалкам перакрытая паваленымі дрэвамі траса Невель — Віцебск”, — адзначаў рэсурс, публікуючы ў пацверджанне фатаграфіі наступстваў стыхіі.

Шкала Бофарта класіфікуе вецер хуткасцю 21–24 м/c як шторм (9 з 12 балаў).

Пасля грозавага фронту ў ноч на 10 ліпеня на гарачыя лініі Міністэрства па надзвычайных сітуацыях паступіла 4,5 тыс. зваротаў па дапамогу, паведаміў 11 ліпеня кіраўнік ведамства Вадзім Сіняўскі пасля дакладу Аляксандру Лукашэнку.

Паводле яго слоў, непагадзь “нанесла значны ўрон 27 населеным пунктам”.

У найбольш пацярпелым Магілёве (1,5 тыс. званкоў ад насельніцтва) было абясточана пяць ліній электраперадачы напругай 110 кВт. Праз выхаду з ладу мясцовай ЦЭЦ-2 спынялася праца прадпрыемства “Магілёўхімвалакно”.

Акрамя таго, паводле чыноўніка, у горадзе пацярпелі асобныя жылыя дамы. Ратавальнікам даводзілася “аператыўна вырашаць пытанні, звязаныя з забеспячэннем працы транспартнай інфраструктуры”.

Сярод пацярпелых таксама адзначаюцца Гарадоцкі і Аршанскі раёны Віцебскай вобласці, Барысаўскі і Смалявіцкі раёны Мінскай вобласці.