У Польшчы беларус аштрафаваны за агрэсіўныя паводзіны ў самалёце

23 ліпеня, Позірк. Беларус, які прыбыў 17 ліпеня авіярэйсам з Анталіі (Турцыя) у Зялёну-Гуру (Любушскае ваяводства, Польшча), быў знойдзены памежнікамі, калі спаў у самалёце, паведаміла 22 ліпеня Памежная ахова Польшчы.

Пасля таго як памежнікі “прымянілі меры прымусу, каб высадзіць яго з самалёта”, пасажыр “праявіў агрэсію і аказаў актыўны супраціў, што запатрабавала надзець на яго кайданкі”. За агрэсіўныя паводзіны ён быў аштрафаваны на 500 злотых (прыкладна 140 долараў).

Таксама Люблінскае мытна-падатковае ўпраўленне 22 ліпеня паведаміла, што супрацоўніца мытнага паста Карошчын на мяжы Польшчы з Беларуссю (памежны пераход Кукурыкі, з беларускага боку — Казловічы, выкарыстоўваецца для грузавога аўтатранспарту) “заўважыла, што кіроўца грузавіка, грамадзянін Беларусі, верагодна, знаходзіцца ў стане алкагольнага ап’янення”: “Яна паведаміла пра гэта свайму начальніку. Алкатэстарам было выяўлена, што мужчына сапраўды быў п’яны”.

Выкліканы на месца здарэння паліцэйскі нарад з Цярэспаля пацвердзіў наяўнасць у крыві беларуса амаль 2,5 праміле алкаголю. Мужчына паўстане перад судом за кіраванне транспартным сродкам у стане алкагольнага ап’янення. Дата здарэння не ўказваецца.