Лукашэнка ўвёў у калегію КДБ намесніка дзяржсакратара Савета бяспекі

25 ліпеня, Позірк. Аляксандр Лукашэнка ўказам № 287 ад 23 ліпеня 2025 года “канкрэтызаваў па службовым прынцыпе” склад калегіі Камітэта дзяржаўнай бяспекі.

Дакумент, апублікаваны 25 ліпеня на Нацыянальным прававым партале, уносіць змены ва ўказ № 325 ад 25 ліпеня 2013 года.

Сярод іншага ў новай рэдакцыі зменены службовы склад калегіі КДБ. Цяпер у яе будуць уваходзіць: кіраўнік спецслужбы (старшыня калегіі), намеснік дзяржаўнага сакратара Савета бяспекі, які курыруе пытанні дзейнасці органаў дзяржбяспекі, усе намеснікі старшыні КДБ, начальнік галоўнага арганізацыйна-інспектарскага ўпраўлення ведамства, начальнікі ўсіх рэгіянальных упраўленняў, а таксама кіраўнік ваеннай контрвыведкі.

Дакументам даецца права іншым супрацоўнікам структур дзяржбяспекі прысутнічаць на пасяджэннях калегіі. Раней на яе маглі запрашацца “прадстаўнікі іншых дзяржаўных органаў і іншых арганізацый”.

Акрамя таго, Лукашэнка зацвердзіў “пералік вайсковых частак і іншых арганізацый, падпарадкаваных Камітэту дзяржаўнай бяспекі” (на партале не апублікаваны).

Як указана ў палажэнні аб спецслужбе, КДБ — гэта “рэспубліканскі орган дзяржаўнага кіравання, які у межах сваёй кампетэнцыі праводзіць дзяржаўную палітыку ў сферы забеспячэння нацыянальнай бяспекі Рэспублікі Беларусь, ажыццяўляе рэгуляванне і кіраванне ў сферы забеспячэння бяспекі асобы, грамадства і дзяржавы, каардынуе дзейнасць у гэтай сферы іншых рэспубліканскіх органаў дзяржаўнага кіравання, а таксама непасрэдна рэалізуе асноўныя напрамкі дзейнасці і задачы органаў дзяржаўнай бяспекі”.

Цяперашні старшыня КДБ Іван Церцель узначальвае спецслужбу з 3 верасня 2020 года.

Камітэт дзяржбяспекі актыўна займаецца пераследам грамадзян, якія не падзяляюць палітыку Лукашэнкі, з’яўляецца адным з ключавых ведамстваў, якія ажыццяўляюць масавыя палітычныя рэпрэсіі.