Крымінальная справа ўзбуджаная па факце гібелі мужчыны на вадзе ў Асіповіцкім раёне

27 ліпеня, Позірк. Аб узбуджэнні крымінальнай справы ў дачыненні да 33-гадовага жыхара Асіповіцкага раёна (Магілёўская вобласць) паведамляе Следчы камітэт.

Адзначаецца, што 26 ліпеня мужчына, “кіруючы гідраскутарам Kawasaki, буксіраваў за сабой цюбінг з людзьмі”.

Паводле звестак СК, “падчас манеўру кіроўца дапусціў сутыкненне цюбінгу з пірсам”. “У выніку 38-гадовая жанчына і 45-гадовы мужчына, якія знаходзіліся на гумавай “плюшцы”, — абодва жыхары Асіповічаў — атрымалі сур’ёзныя траўмы”, — гаворыцца ў паведамленні.

“Відавочцы паспяшаліся на дапамогу, выцягнулі пацярпелых з вады і выклікалі хуткую дапамогу. Абодва былі тэрмінова шпіталізаваныя ў цяжкім стане, аднак праз некалькі гадзін мужчына памёр у бальніцы”, — адзначае ведамства.

У дачыненні да кіроўцы гідраскутара распачатая справа паводле ч. 2 арт. 316 Крымінальнага кодэкса (парушэнне правілаў эксплуатацыі маламерных судоў, якое пацягнула па неасцярожнасці смерць чалавека і прычыненне цяжкіх цялесных пашкоджанняў).

Паводле інфармацыі Міністэрства па надзвычайных сітуацыях, здарэнне з гідраскутарам адбылося на Асіповіцкім вадасховішчы каля вёскі Цяплухі.

Раней паведамлялася, што за мінулыя суткі ў Беларусі патанулі тры чалавекі. Адзін з іх патануў у рацэ Свіслач каля пасёлка Сасновы Асіповіцкага раёна.

Паводле даных МНС, тры чалавекі “паплылі на надзіманым матрацы, на адлегласці каля 15 метраў ад берага адзін нырнуў з матраца і знік пад вадой”.