Спіс “экстрэмісцкіх“ фарміраванняў папоўніла польская “Беларуская Акадэмія“
28 ліпеня, Позірк. Беластоцкі філіял Вышэйшай школы кадраў менеджменту ў Коніне (Польшча, Вялікапольскае ваяводства) “Беларуская Акадэмія” 22 ліпеня ўнесена Камітэтам дзяржаўнай бяспекі ў “Пералік арганізацый, фарміраванняў, індывідуальных прадпрымальнікаў, якія маюць дачыненне да экстрэмісцкай дзейнасці”, варта і абнове.
КДБ вызначыў яе як “грамадзянскую ініцыятыву ў адказ на хвалі рэпрэсій супраць беларускай адукацыі “Беларуская акадэмія / Bialoruska Akademia / Belarusian Academy”. Паводле інфармацыі ведамства, да дзейнасці арганізацыі мае дачыненне 65-гадовая Святлана Сільверстава”.
Да “экстрэмісцкіх” аднесены старонкі і каналы адукацыйнай установы ў “Фэйсбуку” і “Тэлеграме”.
Як вынікае з інфармацыі на сайце ўстановы адукацыі, філіял вядзе падрыхтоўку бакалаўраў (тры гады, вочна) і магістраў (два гады, завочна) па спецыяльнасці “Адміністраванне ў дзяржаўных органах і бізнесе”.
В.а. прадстаўніка па нацыянальным адраджэнні Аб’яднанага пераходнага кабінета (АПК) Павел Баркоўскі, каментуючы прызнанне праекта “экстрэмісцкім фарміраваннем”, заявіў: “Рэжым Лукашэнка ў чарговы раз пацвердзіў, што баіцца незалежных ініцыятыў, якія фарміруюць беларускую ідэнтычнасць і прытрымліваюцца нацыянальнай мовы”.
Паводле яго слоў, якія прыводзіць прэс-служба АПК, праект мае “дакладна адукацыйны і культурны характар”: “Яго ўзначальвае прафесар Святлана Куль-Сільверстава — доктар гістарычных навук, літаратар, паэтка, чалавек высокага інтэлектуальнага аўтарытэту”.
“Яшчэ нядаўна многія думалі, што рэжым не адважыцца закрануць філіялы еўрапейскіх ВНУ, якія працуюць для беларускай аўдыторыі і па-беларуску. Але зараз відавочна: ніякіх “чырвоных ліній” для гэтай улады не існуе. Пераслед можа закрануць любога, хто застаецца верным беларускай культуры і імкнецца перадаць яе наступным пакаленням”.
“У гэтых умовах мы асабліва спадзяёмся на гнуткую і дальнабачную падтрымку з боку еўрапейскіх партнёраў. Беларускія адукацыйныя і культурныя праекты застаюцца жыццёва неабходнымі. Гэта наша актуальная лінія барыкад у барацьбе за незалежную Беларусь — свабодную, еўрапейскую, беларускамоўную”, — дадаў палітык.
“Беларуская Акадэмія” стала 301-м “экстрэмісцкім” фарміраваннем у спісе, які сумесна вядуць КДБ і МУС Беларусі.
Святлана Сільверстава была звольнена з Гродзенскага дзяржуніверсітэта ім. Я. Купалы ў 2014 годзе.
