29 ліпеня, Позірк. Для рэжыму Аляксандра Лукашэнкі “куды важней трымаць грамадзян пад кантролем, чым клапаціцца пра іх здароўе ды бяспеку”, такім чынам беларускі дэмакратычны лідар Святлана Ціханоўская пракаментавала сітуацыю з падзеннем дрона ў Мінску.
“Гэтай ноччу ў Мінску быў збіты чарговы расійскі беспілотнік, — напісала палітык у сваім тэлеграм-канале. — Ён упаў побач з дзіцячым садком № 12 і праляжаў там паўгадзіны да прыезду міліцыі. На шчасце, гэтым разам абышлося без ахвяр. Але толькі за тыдзень на тэрыторыю Беларусі заляцела 59 дронаў, і тое, што ніхто не пацярпеў, — гэта ўсяго толькі шчаслівы збег абставінаў”.
Паводле слоў Ціханоўскай, “рэжым лічыць нармальным трымаць грамадзян у няведанні: не папярэджвае пра пагрозы праз SMS, ТБ альбо радыё”, “не дае інструкцый, як гарантаваць бяспеку дзецям альбо сталым людзям”, “не раскрывае падрабязнасцяў інцыдэнтаў”.
“У такіх умовах нам застаецца толькі самім дбаць адно пра аднаго: інфармаваць, папярэджваць, дапамагаць. Азнаёмцеся з падрабязнай інструкцыяй, што рабіць пры набліжэнні “шахедаў”, і паведаміце блізкім, як яны могуць абараніць сябе”, — параіла дэмлідар.
Пра інцыдэнт са спасылкай на відавочцаў паведаміў партал “Люстэрка”. Было заяўлена, што каля 2:00 29 ліпеня дрон урэзаўся ў дом у Фрунзенскім раёне сталіцы, упаў на прыпаркаваны аўтамабіль і выбухнуў. Медыя адзначыла, што мае відэазапіс крушэння беспілотніка.
Прыкладна праз гадзіну пасля з’яўлення інфармацыі ў СМІ Міністэрства абароны прызнала факт падзення беспілотніка.
“Дзяжурнымі сіламі па СПА каля 2 гадзін ночы 29 ліпеня ў паветранай прасторы Рэспублікі Беларусь быў выяўлены і спынены палёт неапазнанай паветранай цэлі — парушальніка парадку выкарыстання паветранай прасторы, ідэнтыфікаванай як БЛА, — гаварылася ў паведамленні ваеннага ведамства. — У выніку ўздзеяння на яго сродкаў радыёэлектроннай барацьбы 02:33 БЛА ўпаў у раёне дома 72 па вул. Матусевіча г. Мінска”.
Адзначалася, што пацярпелых няма; праводзіцца праверка. З улікам здарэння “аператыўна робяцца дадатковыя захады па ўзмацненні кантролю за выкарыстаннем паветранай прасторы”.
“Кіраўнік дзяржавы трымае сітуацыю на асабістым кантролі”, — заявіла Мінабароны.
