У суд накіравана справа аб карупцыі ў дачыненні да намесніка дырэктара прадпрыемства ў Жодзіне

29 ліпеня, Позірк. Генеральная пракуратура накіравала ў суд крымінальную справу ў дачыненні да намесніка дырэктара дзяржаўнага прадпрыемства ў Жодзіне (Мінская вобласць), вынікае з паведамлення нагляднага органа.

Паводле інфармацыі ведамства, службовая асоба, якая курыравала на прадпрыемстве эканамічныя і камерцыйныя пытанні, абвінавачваецца паводле ч. 2 ст. 430 КК (атрыманне хабару).

Згодна з матэрыяламі справы, “абвінавачаны ў лістападзе — снежні 2024 года дамовіўся з прадстаўнікамі шэрагу камерцыйных структур пра садзейнічанне ў забеспячэнні рэгулярных, своечасовых і ў неабходных аб’ёмах адгрузак прадукцыі завода на іх адрас пры ўмове перадачы яму матэрыяльных каштоўнасцей”.

Сцвярджаецца, што 26 лістапада 2024 года ў будынку завода ў Жодзіне ён “прыняў для сябе ад прадстаўніка камерцыйнай арганізацыі” банкаўскую карту, праз якую яму далі доступ да “рахунку хабарадаўца, адкрытага ў адным з расійскіх банкаў”. З 30 лістапада па 4 снежня 2024 гады ў банкаматах на тэрыторыі РФ фігурант справы зняў з гэтага рахунку ў агульнай складанасці 300 тыс. расійскіх рублёў.

Летась 9 снежня ў Жодзіне, як заяўляе Генпракуратура, ён “атрымаў для сябе ад прадстаўніка іншай камерцыйнай арганізацыі ў якасці хабару выгаду маёмаснага характару” — яму “пагасілі доўг у суме 100 тыс. расійскіх рублёў”.

22 студзеня 2025 года абвінавачаны, як сцвярджаецца, “у будынку завода прыняў для сябе ад таго ж прадстаўніка камерцыйнай арганізацыі ў якасці хабару 300 тыс. расійскіх рублёў”.

Адметна, што “грошы ў мэтах канспірацыі былі перададзеныя яму праз асобу, якая не ведала пра супрацьпраўны характар тых дзеянняў, што здзяйсняюцца”. Усяго па гэтым эпізодзе ён “атрымаў у якасці хабару матэрыяльныя каштоўнасці і выгаду маёмаснага характару на агульную суму 400 тыс. расійскіх рублёў”.

Абвінавачаны ўзяты пад варту.

Каля 850 службовых асоб штогод прыцягваюцца да крымінальнай адказнасці за здзяйсненне карупцыйных злачынстваў, паведаміў генеральны пракурор Андрэй Швед 24 чэрвеня на рэспубліканскай нарадзе па пытаннях эфектыўнасці мер па барацьбе з карупцыяй.

Пры гэтым ён адзначыў, што на працягу апошніх гадоў колькасць карупцыйных злачынстваў, якія рэгіструюцца ў Беларусі, “паступова зніжаецца”: з 1.603 у 2015 годзе да 1.031 у 2024-м.

Раней Генпракуратура паведамляла, што з 1.031 выяўленага ў 2024 годзе карупцыйнага злачынства на хабарніцтва прыпадала 45,1%, а на крадзеж шляхам злоўжывання службовымі паўнамоцтвамі — 32,8%.

Да крымінальнай адказнасці летась, як паведамлялася, было прыцягнута 911 асоб, з іх 14 “займалі адказнае становішча”. Найбольшая колькасць карупцыйных злачынстваў зафіксаваная ў сельскай гаспадарцы, прамысловасці, будаўніцтве і гандлі.

У лютым прэс-служба Вярхоўнага суда паведамляла, што за здзяйсненне карупцыйных злачынстваў у 2024 годзе было асуджана 709 чалавек — на 1,1% менш, чым у 2023 годзе (717).

Найбольш асуджана за крадзеж шляхам злоўжывання службовымі паўнамоцтвамі паводле арт. 210 КК (324 чалавекі); за атрыманне хабару паводле арт. 430 (233); за перавышэнне ўлады або службовых паўнамоцтваў паводле ч. 2 і 3 ст. 426 (85); злоўжыванне ўладай ці службовымі паўнамоцтвамі паводле арт. 424 (30).

За дачу хабару паводле ч. 2 і 3 ст. 431 асуджана 25 чалавек; за злоўжыванне ўладай, перавышэнне ўлады або бяздзеянне ўлады паводле арт. 455 — 9; за бяздзейнасць службовай асобы паводле арт. 425 — адзін; пасрэдніцтва ў хабарніцтве паводле ч. 2 і 3 ст. 432 КК — два.

Згодна з апублікаваным сёлета ў лютым “Індэксам успрымання карупцыі”, які штогод вылічаецца міжнароднай няўрадавай арганізацыяй Transparency International, у Беларусі сітуацыя з карупцыяй пагаршаецца чацвёрты год запар.

Індэкс вызначаецца на аснове ўспрымання ўзроўню карупцыі экспертамі і прадстаўнікамі бізнесу 180 краін і тэрыторый. Дзяржавам прысвойваюць балы — ад 0 (сур’ёзная карупцыя) да 100 (поўная адсутнасць карупцыі).

Па выніках 2024 года Беларусь набрала 33 балы (у 2023-м — 37, у 2022-м — 39, у 2021-м — 41, у лепшым для сябе 2020-м — 47) і падзяліла 114 месца (годам раней 98-е) з Босніяй і Герцагавінай, Лаосам, Манголіяй, Сьера-Леонэ, Панамай і Філіпінамі.