Новы кіраўнік федэрацыі футбола абвясціў пра скарачэнне выдаткаў на камандзіроўкі, але сам паедзе ў штаб-кватэру УЕФА ў Швейцарыю

29 ліпеня, Позірк. Пра скарачэнне выдаткаў на камандзіроўкі, “асабліва замежныя”, абвясціў новы старшыня Беларускай федэрацыі футбола Яўген Булойчык.

Матывацыя — “вострая неабходнасць накіравання дадатковых фінансавых рэсурсаў на развіццё гульні нумар адзін ва ўсіх кутках краіны”, паведаміла 29 ліпеня прэс-служба БФФ.

“Асаблівая ўвага” будзе надавацца “мэтазгоднасці, задачам і эфектыўнасці службовых камандзіровак”. “Пад асаблівы кантроль” будуць узятыя выдаткі на транспарт і пражыванне. Авіяпералёты будуць ажыццяўляцца “выключна эканомкласам”, “дадатковая ўвага” будзе нададзеная катэгорыі гатэляў, якія выбіраюцца. Таксама будуць перагледжаныя падыходы пры накіраванні супрацоўнікаў БФФ для арганізацыі міжнародных матчаў з удзелам зборных каманд па-за межамі краіны.

“Ключавым пасылам з’яўляецца тое, што асноўныя сродкі павінны быць накіраваныя на развіццё футбола ў Рэспубліцы Беларусь, а не на забеспячэнне дзейнасці федэрацыі футбола”, — гаворыцца ў паведамленні.

У тым жа прэс-рэлізе адзначаецца, што сам Булойчык здзейсніць “афіцыйны візіт” у штаб-кватэру Саюза еўрапейскіх футбольных асацыяцый (УЕФА) ў Ньёне (Швейцарыя). Пра гэта новы старшыня БФФ дамовіўся “на мінулым тыдні” з прэзідэнтам УЕФА Аляксандрам Чэферынам.

41-гадовы начальнік галоўнага ўпраўлення спорту і турызму Мінскага аблвыканкама Булойчык быў абраны кіраўніком футбольнай федэрацыі 17 ліпеня на безальтэрнатыўнай аснове. Акрамя чыноўніцкай кар’еры прасоўваўся і па партыйнай лініі: у лістападзе 2024 года стаў кіраваць мінскім абласным аддзяленнем праўладнай партыі “Белая Русь”.

Беларускі футбол знаходзіцца пад частковымі санкцыямі УЕФА, уведзенымі ў чэрвені 2021 года і сакавіку 2022 года пасля адпаведна прымусовай пасадкі ў Мінску самалёта ірландскай авіякампаніі Ryanair, які ляцеў з Афін у Вільнюс, і пачатку поўнамаштабнай агрэсіі Расіі супраць Украіны пры ўдзеле рэжыму Лукашэнкі. Хатнія матчы беларускія клубы і зборныя павінны праводзіць на нейтральных палях.

Улады краіны ўвялі забарону на прафесію для футбалістаў, якія выступілі ў 2020 годзе супраць фальсіфікацыі вынікаў прэзідэнцкіх выбараў на карысць Лукашэнкі і гвалту ў дачыненні да мірных пратэстоўцаў.

Гл. падрабязней:

У сувязі са “шчырым раскаяннем” за 2020 год камісія Шведа дазволіла вярнуцца ў спорт футбалістам Драгуну і Хачатурану (дапоўнена)