АПК заклікаў беларусаў звяртацца да ўладаў па тлумачэнні ў сувязі з БПЛА
29 ліпеня, Позірк. Звяртацца ў мясцовыя органы ўлады і Міністэрства абароны па інфармацыю пра тое, як забяспечваецца бяспека грамадзян Беларусі і чаму ў паветранай прасторы краіны знаходзяцца “небяспечныя для жыцця” БПЛА заклікаў беларусаў у сваёй заяве 29 ліпеня Аб’яднаны пераходны кабінет (АПК).
Заклік тычыцца “ўсіх беларусаў і беларусак, якія не хочуць, каб над іх галовамі ляталі баявыя дроны, каб у гарадах Беларусі гучалі выбухі і каб [Аляксандр] Лукашэнка ўцягнуў краіну ў паўнамаштабную вайну”.
У заяве гаворыцца, што “апошнім часам у паветранай прасторы Беларусі значна расце колькасць ваенных беспілотных лятальных апаратаў РФ, што накіроўваюцца для нанясення ўдараў па тэрыторыі Украіны, у тым ліку па яе мірных гарадах”: “Пра гэта становіцца вядома дзякуючы неабыякавым беларусам і беларускам, незалежным медыя і ініцыятывам”.
“Прадстаўленне паветранай прасторы Беларусі для нанясення ўдараў па тэрыторыі Украіны з выкарыстаннем беспілотных лятальных апаратаў прыводзіць, у тым ліку, да росту пагроз жыццям і здароўю грамадзян і грамадзянак Беларусі”, — лічаць у арганізацыі.
“Усе дзеянні Расійскай Федэрацыі на тэрыторыі Рэспублікі Беларусь, як на зямлі, так і ў паветры, ажыццяўляюцца выключна з асабістай згоды дыктатара Лукашэнкі — і ён, як і яго саўдзельнікі, нясе поўную адказнасць за магчымыя наступствы парушэння Канстытуцыі Рэспублікі Беларусь і міжнароднага права”, — гаворыцца ў заяве.
Палітыка ўладаў накіравана на “поўную перадачу ў распараджэнне Узброеным сілам РФ ваеннага суверэнітэту Беларусі, у тым ліку суверэнітэту над паветранай прасторай”, лічаць у АПК.
Адзначаецца, што “сваімі дзеяннямі рэжым стварае рызыку таго, што грамадзянам і грамадзянкам Беларусі давядзецца прымаць удзел у ваенных дзеяннях”: “Тое, што адбываецца ў паветранай прасторы Беларусі апошнім часам — адзін з індыкатараў падрыхтоўкі рэжыму Лукашэнкі да ўдзелу ў ваенных дзеяннях на баку Расіі”.
“Лукашэнка — саўдзельнік агрэсіі супраць незалежнай і суверэннай Украіны і нясе персанальную адказнасць за ўчыненыя ваенныя злачынствы супраць грамадзян і грамадзянак Украіны і за злачынства агрэсіі супраць Украіны як дзяржавы”, — падкрэслілі ў АПК.
Раніцай 29 ліпеня партал “Зеркало” паведаміў са спасылкай на відавочцаў, што каля 2:00 дрон урэзаўся ў шматпавярховы дом у Фрунзенскім раёне сталіцы, упаў на прыпаркаваны аўтамабіль і выбухнуў.
Прыкладна праз гадзіну пасля з’яўлення інфармацыі ў СМІ Міністэрства абароны прызнала факт падзення беспілотніка.
Пазней Следчы камітэт паведаміў, што ўпаўшы беспілотнік быў нашпігаваны трацілам і вялікай колькасцю паражальных элементаў, распачата крымінальная справа.
СК пацвердзіў, што абломкі беспілотніка пашкодзілі некалькі прыпаркаваных аўтамабіляў і прызямліліся на прылеглую да дома тэрыторыю.
Мінская міліцыя заявіла пра распаўсюджанне “недакладнай інфармацыі” пра затрыманні мінчукоў супрацоўнікамі АМАПа на месцы падзення беспілотнага лятальнага апарата і папярэдзіла, што за “распаўсюд заведама ілжывай інфармацыі прадугледжана крымінальная адказнасць”.
