12-гадовая дзяўчынка знаходзіцца ў рэанімацыі ў цяжкім стане пасля аварыі ў Дзятлаўскім раёне

11 жніўня, Позірк. Пяцёра пацярпелых у дарожна-транспартным здарэнні 10 жніўня Дзятлаўскім раёне (Гродзенская вобласць) знаходзяцца ў бальніцах, паведамляе прэс-служба Міністэрства аховы здароўя.

Адна з іх, 12-гадовая дзяўчынка, пасля аперацыі накіраваная ў аддзяленне рэанімацыі Дзятлаўскай цэнтральнай раённай бальніцы, яе стан ацэньваецца як цяжкі.

У гэтай жа бальніцы лечаць яшчэ дваіх пацярпелых (17 і 24 гады).

Паводле інфармацыі Міністэрства аховы здароўя, 4-гадовае дзіця пераведзенае ў Гродзенскую абласную дзіцячую бальніцу, 23-гадовая пацыентка працягне лячэнне ў бальніцы хуткай медыцынскай дапамогі (лакацыя не ўдакладняецца; верагодна, у Гродне).

Па факце смяротнай аварыі, якая здарылася 10 жніўня ў Гродзенскай вобласці, Следчы камітэт узбудзіў крымінальную справу паводле ч. 3 арт. 317 КК (парушэнне правілаў дарожнага руху, якое прывяло па неасцярожнасці да смерці дзвюх і больш асоб).

Паводле інфармацыі СК, аўтааварыя здарылася каля 18:15 паблізу вёскі Мядзвінавічы (згодна з данымі МУС, непадалёк ад населенага пункта Казлоўшчына). У выніку лабавога сутыкнення аўтамабіляў “Мэрсэдэс” і “Рэно” загінула тры чалавекі (абодва кіроўцы і адна пасажырка), пацярпела яшчэ пяць, у тым ліку трое непаўналетніх.