BySol плануе апублікаваць прамежкавую справаздачу па Стрыжаку 25 верасня

27 жніўня, Позірк. Фонд салідарнасці BySol “працягвае ўнутранае разбіральніцтва па паведамленнях аб магчымых выпадках сексуалізаваных паводзін і злоўжыванні паўнамоцтвамі Андрэем Стрижаком“, гаворыцца ў заяве фонду, апублікаванай 27 жніўня.

У BySol заявілі, што дзеля забеспячэння аб’ектыўнасці праведзеныя кансультацыі са знешнімі экспертамі, якія “спецыялізуюцца на расследаваннях выпадкаў харасмента, злоўжыванні ўладай і сэксуальных дамаганняў“.

На аснове гэтага “быў зацверджаны рэгламент унутранага разбіральніцтва, у якім зафіксаваныя працэдурныя прынцыпы, парадак збору і верыфікацыі інфармацыі, ролі бакоў і механізм узаемадзеяння з пацярпелымі“.

З 28 жніўня па 11 верасня будзе праходзіць этап збору інфармацыі “ад усіх, хто валодае звесткамі, якія маюць дачыненне да сітуацыі, якая разглядаецца“.

Публікацыя другой прамежкавай справаздачы запланаваная на 25 верасня. Першую меркавалася апублікаваць да 1 верасня, па факце гэта было зроблена 27 жніўня.

“На перыяд правядзення разбору, як і паведамлялася раней, Андрэй Стрыжак адхілены ад кіруючай пасады і выканання прадстаўніцкіх функцый ад імя арганізацыі“, — нагадаў фонд.

23 ліпеня BySol паведаміў, што Андрэй Стрыжак адхілены ад “кіруючай пасады“ і “выканання прадстаўніцкіх функцый” у фондзе салідарнасці.

21 ліпеня на “Еўрарадыё“ выйшаў матэрыял “Андрэй Стрыжак і няпрошаныя дыкпікі”. У ім сцвярджалася, што кіраўнік BySol стрыжак высылаў беларускім актывісткам і жанчынам-праваабаронцам дыкпікі (фатаграфіі свайго палавога чальца). Некалькі прадстаўніц фемінісцкай супольнасці пацвердзілі “Еўрарадыё”, што ведаюць пра сітуацыю. Ім вядома як мінімум пра сем падобных кейсаў. Дзве дзяўчыны падзяліліся са згаданым СМІ сваімі гісторыямі.

У той жа дзень Стрыжак на сваёй старонцы ў “Фэйсбуку“ адзначыў, у прыватнасці, што “ў жыцці кожнага чалавека бываюць учынкі, якія не робяць яму гонару“, і папрасіў прабачэння перад усімі, каго яго ўчынкі “маглі абразіць, закрануць або ўстрывожыць“. Паводле сцвярджэння кіраўніка BySol, яго дзеянні “не мелі на ўвазе прымусу, злоўжывання службовым становішчам, прагі нажывы або што-небудзь падобнае”. Ён таксама адмаўляў злы намер або “жаданне прычыніць каму-небудзь шкоду”.

Аб’яднаны пераходны кабінет заявіў аб недапушчальнасці любой праявы харасменту або дамаганняў, “выкарыстання свайго статусу ў грамадзянскай супольнасці дзеля паводзін, якія парушаюць асабістыя межы іншых людзей, закранаюць, зневажаюць, абражаюць жанчын і ствараюць прастору эмацыйнай, псіхалагічнай і фізічнай небяспекі для іх“.