Старшыня Еўракамісіі Урсула фон дэр Ляен наведае мяжу ЕС з Беларуссю

28 жніўня, Позірк. Старшыня Еўрапейскай камісіі Урсула фон дэр Ляен 31 жніўня наведае польска-беларускую, а 1 верасня — літоўска-беларускую мяжу, вынікае з інфармацыі на сайце ЕС.

Наведванні адбудуцца ў рамках паездкі кіраўніцы ЕК ва ўсходнія краіны Еўрасаюза, якая пачынаецца 29 жніўня.

Чакаецца, што 29 жніўня фон дэр Ляен наведае Латвію і Фінляндыю, 30-га — Эстонію, 31-га — Польшчу і Балгарыю, 1 верасня — Літву і Румынію.

У паведамленні адзначаецца, што візіт старшыні Еўракамісіі “падкрэсліць падтрымку ЕС краін — членаў, якія сутыкаюцца з праблемамі, звязанымі з агульнымі межамі з Расіяй ці Беларуссю”. Анансаваныя сустрэчы фон дэр Ляен з кіраўнікамі ўрадаў і ваенным кіраўніцтвам гэтых краін.

Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.