Котаў пакінуў Турцыю па моры з польскім праязным дакументам — СМІ
28 жніўня, Позірк. Міжнародны каардынатар Беларускага фонду спартыўнай салідарнасці (БФСС) Анатоль Котаў, які 27 жніўня быў аб’яўлены БФСС зніклым без вестак у Турцыі, пакінуў краіну 21 жніўня ў 18:35 праз порт Трабзон на Чорным моры, пры гэтым ён выкарыстоўваў польскі праязны дакумент, вынікае з інфармацыі турэцкага навіннага агенцтва IHA.
Са спасылкай на свае крыніцы СМІ адзначае, што ў Стамбул Котаў прыбыў у той самы дзень а 13:49 з Варшавы. Куды менавіта ён адправіўся з Трабзона, не ўдакладняецца.
27 жніўня БФСС заклікаў міжнародную спартовую супольнасць і праваабарончыя арганізацыі “тэрмінова звярнуць увагу на знікненне” функцыянера, якога называе “вядомым спартыўным чыноўнікам” і “даўнім абаронцам правоў беларускіх спартсменаў”.
БФСС адзначаў, што Котаў 21 жніўня адправіўся ў Стамбул па “прафесійных справах”.
“Неўзабаве пасля яго прыбыцця кантакт з ім быў страчаны. Апошні раз ён выходзіў на сувязь у той жа дзень. З таго часу яго месцазнаходжанне застаецца невядомым”, — гаварылася ў рэлізе.
Аб страце сувязі з прадстаўніком БФСС Котавым паведаміў у “Фэйсбуку” 25 жніўня кіраўнік арганізацыі Аляксандр Апейкін.
Котаў — экс-супрацоўнік адміністрацыі Аляксандра Лукашэнкі і Кіраўніцтва справамі прэзідэнта, былы генеральны сакратар Нацыянальнага алімпійскага камітэта, дыпламат з досведам працы ў Міністэрстве замежных спраў.
У 2020 годзе пакінуў дзяржслужбу, падтрымаў масавыя пратэсты і далучыўся да БФСС. Неўзабаве пасля гэтага эмігрыраваў у Польшчу.
Беларускі фонд спартовай салідарнасці быў заснаваны спартовымі функцыянерамі і атлетамі ў адказ на падзеі пасля прэзідэнцкіх выбараў 2020 года. Займаецца падтрымкай спартсменаў, якія падвергліся пераследу, і абаронай іх правоў. Прызнаны “экстрэмісцкім фарміраваннем”.
