НАУ: Неабходны папераджальны санкцыйны ўдар па рэжыме Лукашэнкі
31 жніўня, Позірк. Аб неабходнасці “папераджальнага санкцыйнага ўдару” па рэжыме Аляксандра Лукашэнкі гаворыцца ў трэцяй — заключнай — серыі фільма “Беларусь у цісках вайны”, падрыхтаваным Народным антыкрызісным упраўленнем (НАУ).
Серыя пад назвай “Цана маўчання: прадухіленне катастрофы” апублікаваная 31 жніўня.
“Цяперашнія санкцыі, як паказала гісторыя, часта спазняюцца і не дасягаюць патрэбнага эфекту. Яны наносяць удар, калі цягнік ужо сышоў. Трэба ўвесці новы, магутны, легітымны пакет санкцый”, — падкрэслівае НАУ.
Мэта такіх санкцый — “блакаваць усе абыходныя схемы, пазбавіць рэжым кіслароду, перакрыць лагістычныя вузлы, знішчыць кампаніі-пракладкі”. “І самае галоўнае — ударыць па тых, хто супрацоўнічае з беларускім і расійскім ваенна-прамысловым комплексам”, — адзначаюць аўтары.
Гэтыя меры, як заяўляецца, “павінны быць уведзеныя не пасля таго, як беларусаў адправяць на фронт, а да гэтага”. “Мы павінны зрабіць так, каб вайна была для рэжыму нявыгадная, каб яна стала немагчымай”, — гаворыцца ў фільме.
Паводле слоў кіраўніка НАУ Паўла Латушкі, міжнародная супольнасць павінна “накіраваць выразныя і недвухсэнсоўныя сігналы рэжыму Лукашэнкі”.
“Павінна быць агучана вельмі сур’ёзная пазіцыя, што любое прамое садзейнічанне агрэсіі прывядзе да беспрэцэдэнтнай міжнароднай ізаляцыі рэжыму Лукашэнкі. Гэта азначае, што будуць ужытыя ўсе магчымыя дыпламатычныя, эканамічныя і палітычныя меры, каб пазбавіць урад у Мінску магчымасці дзейнічаць на міжнароднай арэне і выключыць яго з усіх важных працэсаў”, — сказаў Латушка.
“Гэтыя сігналы павінны быць гучнымі і публічнымі, эфектыўнымі, каб выключыць любыя непаразуменні і паказаць, што свет не будзе стаяць у баку. Яны павінны ясна даць зразумець: выбар за вамі, але за кожны няправільны крок будзе суровая цана”, — дадаў палітык.
“Вельмі важным” ён назваў “пераключэнне на прэвентыўны падыход у цэлым”. “Замест таго каб рэагаваць постфактум на ўжо здзейсненыя дзеянні, сусветная супольнасць павінна распрацаваць і ўкараніць механізм папераджальных мер. Гэта азначае пастаянны маніторынг, выведвальная праца і гатоўнасць да неадкладнага ўвядзення жорсткіх мер пры першых прыкметах эскалацыі або падрыхтоўкі да яе”, — удакладніў Латушка.
“Мы не можам дазволіць сабе паўтарыць мінулыя памылкі. Акно магчымасцяў звужаецца, і кожны дзень прамаруджання павялічвае рызыкі, якія ў канчатковым выніку кладуцца на плечы звычайных беларусаў”, — адзначыў кіраўнік НАУ.
Як заявіў аналітык арганізацыі Арцём Брухан, “папераджальны падыход” у санкцыйнай палітыцы — “гэта не проста набор рэкамендацый”. “Гэта дарожная карта для прадухілення катастрофы. Толькі сістэмныя і скаардынаваныя прэвентыўныя меры — фінансавыя, палітычныя, дыпламатычныя, інфармацыйныя — у спалучэнні з магутнай падтрымкай беларускай грамадзянскай супольнасці могуць пазбавіць рэжым Лукашэнкі рэсурсаў і волі да далейшай эскалацыі. Неабходная рашучасць, каб Беларусь не ператварылася ў яшчэ адзін тэатр ваенных дзеянняў. Каб распаўсюджванне гэтага віруса агрэсіі стала немагчымым”, — сказаў Брухан.
Першая серыя фільма (“Уваходжанне ў арбіту Крамля: мілітарызацыя і інтэграцыя”) была апублікаваная 3 жніўня, другая (“Трансфармацыя грамадства: падрыхтоўка да вайны на ўсіх узроўнях”) — 24 жніўня.
Фільм падрыхтаваны на падставе дакладу НАУ “Сістэмная падрыхтоўка рэжыму Лукашэнкі да магчымага ўступлення ў вайну на баку Расіі і рэкамендацыі па прадухіленні гэтага сцэнарыя”, прэзентаванага 1 жніўня.
Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Тэрыторыя Беларусі на першапачатковым этапе выкарыстоўвалася для ўварвання.
Сумесныя з РФ ваенныя вучэнні “Захад-2025” пройдуць на беларускай тэрыторыі ў верасні.
