Літва плануе да канца тыдня завяршыць умацаванне дарог да памежных пераходаў з Беларуссю і РФ

2 верасня, Позірк. Літоўскія вайскоўцы плануюць да канца гэтага тыдня завяршыць умацаванне пад’язных шляхоў да памежных пераходаў на мяжы з Беларуссю і Расіяй, паведаміў 2 верасня LRT прадстаўнік Штаба абароны Узброеных сіл (УС) Літвы Арнолдас Анелаўскас.

“Плануецца, што да канца гэтага тыдня будуць умацаваныя ўсе астатнія запланаваныя пункты пропуску, а менавіта 19”, — паведаміў ён. Адзначаецца, што цяпер сродкі контрмабільнасці разгорнутыя ў дзесяці пунктах пропуску.

Для ўмацавання выкарыстоўваюць так званыя “зубы дракона”, злучаныя адмысловымі тросамі.

“Надоўбы не створаць нязручнасцей жыхарам, паколькі загароды ўсталяваныя толькі на дарогах, якімі не карыстаюцца, што месцяцца на памежных кантрольна-прапускных пунктах. На дарогах, якія выкарыстоўваюцца, будуць размешчаныя такім чынам, каб яны былі лёгкадаступныя і не стваралі нязручнасцяў”, — заявіў Анелаўскас.

Напрыканцы мінулага тыдня стала вядома, што літоўскія вайскоўцы ўсталявалі дадатковыя загароды ў зачыненых пунктах пропуску на мяжы з Беларуссю і Расіяй. Адзначалася, што гэта “частка планавых мер па абмежаванні мабільнасці на балтыйскім рубяжы абароны”.

“Усталяваныя загароды — гэта толькі частка вялікай, цэласнай карціны. Мы пачнем з тактычнага ўзроўню — канкрэтных перашкод на мяжы, а затым аб’яднаем увесь інжынерны сцэнарый у адзіную канцэптуальную сістэму”, — заявіў камандуючы УС Літвы Раймундас Вайкшнорас.

Паведамлялася, што пункты пропуску сярод іншага ўмацаваныя “зубамі дракона” — загародамі супраць бронетэхнікі. Яны “ўсталяваныя на дарогах у памежных пунктах пропуску, якія не выкарыстоўваюцца, а ў тых, што выкарыстоўваюцца, — у лёгкадаступных месцах побач з дарогамі, каб пры неабходнасці іх можна было хутка ўжыць”, гаварылася ў рэлізе.

“Меры па ўзмацненні аховы мяжы ўжо рэалізаваныя на зачыненых памежных пунктах пропуску Шумскас, Лаварышкес, Райгардас, Латэжэрыс [на мяжы] з Беларуссю, а таксама на пагранічным пункце пропуску Раманішкес з Расіяй, што не выкарыстоўваецца, і ў некаторых іншых месцах”, — падкрэслівалася тады ў паведамленні.

Зробленыя захады скіраваны на “зніжэнне пагрозы сухапутнага ўварвання і абмежаванне магчымых дзеянняў варожых дзяржаў на сушы”, адзначалі УС.

29 ліпеня 2024 года тагачасны міністр абароны Літвы Лаўрынас Кашчунас анансаваў збудаванне 27 “паркаў сродкаў контрмабільнасці” на мяжы з Беларуссю і РФ.

Да канца мінулага года гэтыя паркі планавалася запоўніць “зубамі дракона”, зборнымі “вожыкамі” (таксама загароды супраць бронетэхнікі) і “іспанскімі канямі” (драцяныя супрацьпяхотныя загароды). Паводле слоў Кашчунаса, у выпадку небяспекі “пасля атрымання сігналаў выведкі” гэтыя сродкі з паркаў “будуць дастаўленыя да месца ўсталявання”.

У студзені 2024 года кіраўнікі вайсковых ведамстваў краін Балтыі ўхвалілі канцэпцыю будаўніцтва абарончых збудаванняў на межах з РФ і Беларуссю, закліканых абмежаваць мабільнасць войскаў праціўніка.

8 жніўня 2023 года Літва закрыла на мяжы з Беларуссю пункты пропуску Шумскас (з сумежнага боку Лоша) і Цвярачус (Відзы), 1 сакавіка 2024-га — Лаварышкес (Катлоўка) і Райгардас (Прывалка). Закрыты таксама Латэжэрыс (Парэчча) — пункт пропуску, праз які раней на падставе спрошчанай працэдуры ажыццяўлялася перамяшчэнне грамадзян, якія стала жывуць на прыгранічнай тэрыторыі.

На мяжы з Беларуссю працягваюць працаваць два пагранпераходы — Мядзінінкай (Каменны Лог) і Шальчынінкай (Беняконі).