Латушка падаў у суд на Карпушонак
5 верасня, Позірк. Кіраўнік Народнага антыкрызіснага ўпраўлення (НАУ), намеснік кіраўніцы Аб’яднанага пераходнага кабінета (АПК) Павел Латушка падаў судовы пазоў аб абароне гонару і годнасці супраць дэлегата Каардынацыйнай рады (КР) Вольгі Карпушонак.
Як паведаміў палітык у сваім тэлеграм-канале, пазоў пададзены ў Акруговы суд Варшавы, у дакуменце адказчыцы прапануецца “цягам чатырнаццаці дзён з дня пачатку дзеяння рашэння суда, вынесенага па гэтай справе, апублікаваць замацаваны пост-абвяржэнне ў сацыяльнай сетцы “Фэйсбук”, дзе былі размешчаны ілжывыя звесткі пра мяне, наступнага зместу”.
Ісцец прапануе такі тэкст-абвяржэнне: “Я, Volha Karpushonak, у выніку прайгранага працэсу прыношу прабачэнні Паўлу Латушку за парушэнне яго асабістых дабротаў у выглядзе годнасці і добрага імя праз публікацыю мной ілжывай інфармацыі пра яго і распаўсюд гэтай інфармацыі сярод асоб, з якімі ён мае прафесійныя і палітычныя кантакты. Пры гэтым заяўляю, што Павел Латушка ніколі не здзяйсняў у адносінах да мяне супрацьпраўных ці этычна сумнеўных дзеянняў, а мае дзеянні па распаўсюду ілжывай інфармацыі былі накіраваныя на яго дыскрэдытацыю ў вачах грамадскасці”.
“Прапаную Вользе Карпушонак, якая з’яўляецца адвакатам, правесці гэтае разбіральніцтва ў межах прапанаванай судовай працэдуры на тэрыторыі Польшчы. Я буду дамагацца абароны свайго гонару і годнасці ўсімі магчымымі прававымі спосабамі”, — падкрэсліў Латушка.
Паводле яго слоў, у межах пазову ён будзе дамагацца “абмежавання магчымасці Вольгі Карпушонак у публічным распаўсюджванні паклёпніцкіх звестак у адносінах да мяне”.
Раней 5 верасня “поўную падтрымку і давер” Латушку ў сітуацыі з Карпушонак выказаў АПК.
30 жніўня дэлегат КР (фракцыя “Хопіць баяцца!”), былы адвакат Карпушонак абвінаваціла Латушку ў сексуальных дамаганнях.
1 верасня яна паведаміла пра гатоўнасць “пацвярджаць свае словы канкрэтнымі фактамі”.
Латушка назваў гэтыя абвінавачанні “хлуснёй і паклёпам”. Ён паведаміў пра намер звярнуцца ў праваахоўныя органы з заявай пра паклёп, а таксама падрыхтаваць грамадзянскі пазоў да Карпушонак аб абароне гонару і годнасці і патрабаваць абвяржэння.
У НАУ заявілі, што публікацыя “чарговага паклёпу Вольгі Карпушонак” — гэта спецаперацыя КДБ, накіраваная на дыскрэдытацыю Латушкі.
3 верасня ў сетцы быў размешчаны скан ліста нібыта ад імя Карпушонак прэзідэнту Парламенцкай асамблеі Савета Еўропы (ПАСЕ), у якім яна сцвярджае, што “стала ахвярай сексуальных дамаганняў” з боку Латушкі. У адказ той заявіў, што дзеянні Карпушонак накіраваныя на ліквідацыю КР і пазбаўленне яе міжнароднага прызнання. Латушка і Карпушонак з’яўляюцца членамі дэлегацыі КР у ПАСЕ.
4 верасня ў КР паведамілі, што сёлета з сакавіка да жніўня Карпушонак спампавала з агульнага сховішча файлаў больш за 70 працоўных дакументаў. Адзначалася, што “гэтыя дакументы даступныя для ўсіх дэлегатаў КР і не ўтрымліваюць нейкіх сакрэтных даных, аднак актыўнасць нетыповая: да сакавіка 2025 года Вольга не спампавала ніводнага дакумента, але пасля сакавіка — спампоўвала ўсе дакументы, якія публікаваліся для членаў КР”.
На гэты момант месцазнаходжанне Карпушонак невядомае.
