Польшча закрые мяжу з Беларуссю ў сувязі з вучэннямі “Захад-2025” (дапоўнена)

9 верасня, Позірк. Польшча закрые мяжу з Беларуссю ў ноч на пятніцу, 12 верасня, абвясціў 9 верасня перад пасяджэннем урада прэм’ер-міністр Дональд Туск.

Чыгуначныя пераходы таксама будуць закрытыя, паведамляе выданне Rzeczpospolita.

“З меркаванняў нацыянальнай бяспекі мы закрыем памежныя пераходы з Беларуссю апоўначы ў ноч з чацвярга на пятніцу”, — паведаміў польскі прэм’ер.

Паведамляецца, што рашэнне звязана з запланаванымі беларуска-расійскімі стратэгічнымі вучэннямі “Захад-2025”, якія пройдуць 12–16 верасня.

Туск, як паведамляе партал Onet, назваў вучэнні “Захад-2025” “вельмі агрэсіўнымі” і нагадаў, што яны будуць праходзіць “у непасрэднай блізкасці ад польскай мяжы”.

“Гэта мае свае наступствы. Мэтай гэтых вучэнняў, між іншым, з’яўляецца Сувалкскі калідор, пакуль што для сімуляцыі баявых дзеянняў”, — заявіў Туск, дадаўшы, што Польшча сутыкаецца з усё большай колькасцю правакацый з боку Расіі і Беларусі.

Таксама прэм’ер згадаў пра затрыманне ў Беларусі польскага манаха Гжэгажа Гавела, назваўшы гэта прыкладам “надзвычай агрэсіўнай правакацыі” з боку Мінска і Масквы.

У адказ на расійска-беларускія вучэнні ў Літве, Латвіі і Польшчы таксама пачаліся ваенныя манеўры.

У Латвіі вучэнні “Namejs 2025” (“Намей 2025”) арганізаваныя Нацыянальнымі ўзброенымі сіламі. У іх бяруць удзел каля 12.000 латвійскіх і замежных вайскоўцаў, у тым ліку з Эстоніі.

У Літве вучэнні называюцца “Perkūno Griausmas” (“Гром Перуна”), у іх бяруць удзел каля 17.000 вайскоўцаў Літвы і краін НАТО.

У Польшчы пачаліся стратэгічныя ваенныя вучэнні “Жалезны абаронца-2025”, найбуйнейшыя для краіны ў 2025 годзе: у манеўрах удзельнічаюць каля 34 тыс. салдат і афіцэраў з Польшчы і краін-саюзніц НАТА, а таксама больш за 600 адзінак ваеннай тэхнікі розных тыпаў.

Пра затрыманне ў Лепелі (Віцебская вобласць) жыхара Кракава Гжэгажа Гавела 1998 года нараджэння (пазней высветлілася, што ён манах-кармеліт), які нібыта збіраў сакрэтную інфармацыю для спецслужбаў сваёй краіны, сцвярджалася ў сюжэце дзяржаўнага тэлеканала “Беларусь 1”, які выйшаў у эфір 4 верасня. Польшча паабяцала адрэагаваць на тое, што адбылося.

Як паведамлялася, падчас вучэнняў “Захад-2025” будуць адпрацаваныя “планаванне прымянення” ядзернай зброі і комплексу “Арэшнік”, а таксама супрацьпаветраная абарона, абарончыя баявыя дзеянні, падтрымка тактычнай авіяцыі і інш.

Паводле даных літоўскай ваеннай выведкі, у манеўрах возьмуць удзел да 30 тыс. вайскоўцаў.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.