У жніўні МАЗ прадаў на расійскім рынку ўдвая менш новых грузавікоў, чым годам раней
12 жніўня, Позірк. У жніўні 2025 года на расійскім рынку прададзена 210 новых грузавікоў Мінскага аўтамабільнага завода — у 2,04 раза менш, чым за той жа месяц 2024-га (428), гаворыцца ў даследаванні “АСМ-холдынг” (РФ).
Прадукцыя МАЗа ў мінулым месяцы заняла 7-е месца ў спісе самых прадаваных брэндаў гэтага сегмента аўтарынка Расіі, канстатавалі эксперты (у студзені, лютым і сакавіку было 6-е, у красавіку прадпрыемства дзяліла 5–6-е, траўні — 4-е, чэрвені і ліпені — 7-е). Доля на рынку склала 4,3% (у ліпені — 4,5%).
Лідарамі продажаў у справаздачным месяцы сталі: КамАЗ — 1.465 (-13,3% да жніўня 2024-га), SITRAK — 380 (-78,1%) і SHAANXI — 573 (-63,6%).
За восем месяцаў 2025 года беларускае прадпрыемства рэалізавала на рынку РФ 2.029 грузавікоў (3.759; -46%).
За мінулы год беларускае прадпрыемства збыла ў РФ 5.719 адзінак гэтай тэхнікі (за 2023 год — 6.406; -10,7%).
Пяцёрка лідараў продажаў па выніках 2024 года: КамАЗ (23.121; -26,5% да ўзроўню продажаў 2023-га), SITRAK (19.376; -19,2%), Shacman (15.545; -25,6%), FAW (11.680; -26,3%), Dongfeng (9.990; рост у 2,1 раза).
На нарадзе па развіцці прамысловасці 9 красавіка 2024 года Аляксандр Лукашэнка заявіў, што “айчынная прадукцыя саступае аналагам як ў цане, так і ў якасці”. “Доля нашых грузавых аўтамабіляў [на расійскім рынку] знізілася — да 6%”, — звярнуў увагу ён.
15 чэрвеня 2023 года першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці адмысловых ахоўных мер праз актыўную экспансію кітайскіх вытворцаў”.
Лукашэнка сёлета 31 ліпеня на нарадзе з кіраўнікамі беларускіх дыпламатычных прадстаўніцтваў выказаў незадаволенасць тым, што на расійскі рынак “пранікаюць тавары з трэціх краін без усялякай лакалізацыі”, выціскаючы беларускую прадукцыю.
Буйныя прамысловыя прадпрыемствы, у тым ліку МАЗ, не выканалі заданні па пастаўках прадукцыі ў Расію. Пра гэта, паводле паведамлення беларускай амбасады ў Маскве, ішла размова 10 верасня на пасяджэнні міжведамаснай рабочай групы па ажыццяўленні маніторынгу сітуацыі з пастаўкамі ў РФ.
“Нягледзячы на станоўчую дынаміку тэмпаў росту экспарту, адзначаныя негатыўныя тэндэнцыі па асобных таварных групах, невыкананне экспартных заданняў асобнымі дзяржаўнымі органамі і прадпрыемствамі”, — гаворылася ў прэс-рэлізе.
