Аказанне прававой дапамогі па крымінальных справах абмеркаваў кіраўнік СК Беларусі з МУС Грузіі

18 верасня, Позірк. Пытанні аказання прававой дапамогі па крымінальных справах абмеркавалі старшыня Следчага камітэта Беларусі Дзмітрый Гара і міністр унутраных спраў Грузіі Гела Геладзэ, паведамляе прэс-служба СК.

Сустрэча з дэлегацыяй МУС Грузіі адбылася ў горадзе Ляньюньган (Кітай) 18 верасня.

Таксама гаворка ішла аб “лічбавізацыі следчых працэсаў, укараненні сучасных аналітычных інструментаў і павышэнні кваліфікацыі супрацоўнікаў”.

Грузінскі бок аб перамовах не паведамляе.

Гара прыбыў у Кітай для ўдзелу ў канферэнцыі Глабальнага форуму супрацоўніцтва ў галіне грамадскай бяспекі. 16 верасня ён абмеркаваў супрацу з міністрам грамадскай бяспекі КНР.

Геладзэ, які раней займаў пасаду намесніка начальніка Службы дзяржбяспекі Грузіі, узначаліў МУС у канцы мая бягучага года.

У Грузію пераехалі многія беларусы, якія былі вымушаныя пакінуць краіну з-за пераследу ўладаў – там зараз пражывае каля 12 тыс. беларусаў, якія эмігравалі з-за пагрозы рэпрэсій. Супрацоўніцтва сілавых ведамстваў можа ўяўляць для іх небяспеку.

Краінай кіруе партыя “Грузінская мара” прарасійскага алігарха Бідзіны (Барыса) Іванішвілі. Тбілісі не даў прыстанішча ніводнаму грамадзяніну Беларусі. З 2019 года адмоўлена ў прадастаўленні прытулку 72 заяўнікам, у тым ліку 36 мужчынам, 20 жанчынам і 16 непаўналетнім.

Найбольш вядомы кейс у беларускага праваабаронцы-палітуцякача Рамана Кісляка, які ў ліпені 2025 года беспаспяхова завяршыў праходжанне ўсіх унутраных працэдур абскарджання адмовы ў прытулак. У яго скончыўся тэрмін дзеяння беларускага пашпарта (яго немагчыма замяніць за мяжой пасля забароннага ўказа ад 4 верасня 2023 года). На працягу 30 дзён праваабаронца павінен быў пакінуць краіну, але ў жніўні Камітэт ААН па правах чалавека пачаў вядзенне па скарзе Кісляка супраць Грузіі і запатрабаваў не высылаць яго ў краіну паходжання.

Улады Грузіі адмовіліся выдаць беларускаму праваабаронцу даведку аб статусе прасіцеля прытулку, гэта закрывае шлях для атрымання новага часовага пасведчання асобы, паведаміў ён “Позірку“ напярэдадні.

Кісляк пераехаў у Грузію летам 2021 года з-за палітычнага пераследу, стаў сузаснавальнікам арганізацыі “Беларуская дыяспара Аджарыі”. У снежні 2024 года МУС Беларусі па невядомых прычынах уключыў яго ў склад датычных да інфармацыйнага агенцтва “Позірк”, якое прызнаў “экстрэмісцкім фарміраваннем”.