Сярод пацярпелых у выніку атакі беспілотнікаў у Крыме ёсць грамадзяне Беларусі

22 верасня, Позірк. Грамадзяне Беларусі ёсць сярод 13 пацярпелых, якія паступілі ў Ялцінскі шматпрофільны медыцынскі цэнтр Федэральнага медыка-біялагічнага агенцтва РФ пасля атакі беспілотнікаў 21 верасня, паведаміла ў сваім тэлеграм-канале Яніна Паўленка — “кіраўнік адміністрацыі” горада, які знаходзіцца ў анексаваным Расіяй Крыме.

Паводле звестак чыноўніцы, 12 чалавек шпіталізавана, у тым ліку 4 — у цяжкім стане, 7 — у стане сярэдняй ступені цяжкасці. “Вырашаецца пытанне пра магчымае транспартаванне аднаго з пацыентаў санавіцыяй пасля чарговага лекарскага агляду. Агулам праведзена чатыры аперацыі. Адзін пацыент знаходзіцца на штучнай вентыляцыі лёгкіх, аднаму спатрэбілася пераліванне крыві”, — напісала Паўленка.

Ва ўсіх пацярпелых аскепкавыя раненні. Яны знаходзіліся на берагавой лініі Фароса ў момант атакі УСУ ўвечары 21 верасня.

Колькасць пацярпелых беларусаў і іх стан не ўдакладняецца.

Расія анексавала ўкраінскія тэрыторыі — Аўтаномную Рэспубліку Крым і горад Севастопаль — у 2014 годзе. Праезд іншаземцаў у Крым не праз яе тэрыторыю Украіна лічыць парушэннем заканадаўства.